ენტონი ბლინკენი მუჰამედ ბინ სალმანს შეხვდა
სამშაბათს აშშ-ის სახელმწიფო მდივანი ენტონი ბლინკენი საუდის არაბეთის ტახტის მემკვიდრე პრინცს, მუჰამედ ბინ სალმანს ჯედაში შეხვდა.
სახელმწიფო მდივნის ვიზიტი ორ ქვეყანას შორის დაძაბულობის ფონზე დაიწყო. ცოტა ხნის წინ, საუდის არაბეთმა განაცხადა, რომ შეამცირებს ნავთობის წარმოებას, რამაც ნავთობის ფასის ზრდა გამოიწვია.
შეხვედრის შესახებ განცხადებაში, სახელმწიფო დეპარტამენტის სპიკერმა მეთიუ მილერმა თქვა, რომ ბლინკენმა და ბინ სალმანმა განიხილეს ერთობლივი ძალისხმევა ტერორიზმის წინააღმდეგ ბრძოლაში, უსაფრთხოების ვითარება იემენში და ეკონომიკური თანამშრომლობის გაფართოება - სუფთა ენერგეტიკასა და ტექნოლოგიებში.
მილერმა თქვა, რომ ბლინკენმა მადლობა გადაუხადა ბინ სალმანს ხუთშაბათს, D-ISIS მინისტერიალის მასპინძლობისთვის, სუდანიდან ასობით ამერიკის მოქალაქის ევაკუაციისთვის და ქვეყანაში ბრძოლის შეწყვეტისთვის მათი ერთობლივი ძალისხმევისთვის.
"ორივე მხარემ დაადასტურა ერთობლივი ვალდებულება სტაბილურობის, უსაფრთხოებისა და კეთილდღეობის გასაუმჯობესებლად ახლო აღმოსავლეთში და მის ფარგლებს გარეთ, მათ შორის ყოვლისმომცველი პოლიტიკური შეთანხმების მეშვეობით იემენში მშვიდობის, კეთილდღეობისა და უსაფრთხოების მისაღწევად," - აღნიშნა მილერმა.
ბლინკენი საუდის არაბეთში სამშაბათს ჩავიდა და იქ ხუთშაბათამდე დარჩება.
