ახალი ამბები

სარატოვის მახლობლად მდებარე "ენგელს-2"-ის სამხედრო აეროდრომის სატელიტური სურათებით თუ ვიმსჯელებთ, რუსეთი შესაძლოა უკრაინაზე სტრატეგიული ბომბდამშენების გამოყენებით ახალი მასიური სარაკეტო თავდასხმისთვის ემზადებოდეს. ამის შესახებ გამოცემა Der Spiegel 30 ნოემბერს წერს.

"სატელიტური სურათები აჩვენებს უჩვეულო პროცესებს რუსეთის მთავარ სამხედრო აეროდრომზე. ექსპერტები ხედავენ გაძლიერებულ საბრძოლო მზადყოფნას "ენგელს-2"-ზე და საუბრობენ უკრაინაზე ახალ, ძლიერი საჰაერო თავდასხმაზე", - წერს Der Spiegel.

გამოცემის მიერ გამოქვეყნებულ ფოტოებზე ნაჩვენებია თითქმის ორი ათეული სტრატეგიული ბომბდამშენი Tu-95 და Tu-160. ასაფრენი ბილიკზე დგას დიდი სატვირთო თვითმფრინავები და სატვირთო ავტომობილები, რომლებიც გამოიყენება ფრთოსანი რაკეტების, X-55-ის ან X-101-ის გადასატანად.

"ბაზაზე აქტივობა ძალიან მაღალია. ასაფრენ ბილიკზე ბომბდამშენების უჩვეულოდ დიდი რაოდენობა მიუთითებს გაფრენების რაოდენობის ზრდაზე ან თუნდაც მოახლოებულ სრულმასშტაბიან თავდასხმაზე", - თქვა სამხედრო ანალიტიკოსმა არდა მევლუთოღლუმ და მიუთითა ტანკერებზე, საბრძოლო მასალის ყუთებზე, მანქანებზე და სარემონტო მასალებზე.

მას ეთანხმება პოლონური ანალიტიკური ცენტრის Rochan Consulting-ის ხელმძღვანელი კონრად მუზიკა.

"ადგილზე დიდი მოძრაობაა, მიმდინარეობს თვითმფრინავების მომსახურება და, ცხადია, ახალი ოპერაციებისთვის მზადება. გარდა ამისა, შეგიძლიათ ნახოთ სატვირთოები, რომლებიც გამოიყენება X-55 ან X-101 ფრთოსანი რაკეტების გადასატანად", - განაცხადა მან. 

ანალიტიკოსები აეროდრომ "ენგელს-2"-ს უწოდებენ რუსეთის საჰაერო ძალების ერთ-ერთ ყველაზე მნიშვნელოვან ბაზას, რადგან მასზე განთავსებულია სტრატეგიული ბომბდამშენების ორი პოლკი. რუსეთმა შეჭრის წინა დღეს იქ დამატებითი ძალები განათავსა და მას შემდეგ ბაზა უკრაინაში მასიური საჰაერო თავდასხმებისთვის გამოიყენება.