ახალი ამბები

რუსმა ოკუპანტებმა მათ მიერ ოკუპირებული ყირიმიდან სამხედრო ხომალდების ნაწილი გაიყვანეს. ამის შესახებ 17 ივლისს უკრაინის შეიარაღებული ძალების საზღვაო ძალებმა ფეისბუქზე განაცხადეს.

"მტერმა სევასტოპოლიდან ნოვოროსისკში გაიყვანა გემების მნიშვნელოვანი რაოდენობა და აგრძელებს აზოვის ზღვაში საზღვაო ზოლების კონტროლს დონეცკისა და ზაპოროჟიეს რეგიონებში ჩამორთმეული პროდუქტების უკანონო ექსპორტის მიზნით", - ნათქვამია განცხადებაში.

უკრაინელმა სამხედროებმა აღნიშნეს, რომ რუსული ხომალდები საბრძოლო მოვალეობას ასრულებენ "სარეკეტო უსაფრთხო ზონაში, სანაპირო საჰაერო თავდაცვის სისტემების დაფარვის ზონაში, რაც შეიძლება ახლოს სანაპიროსთან".

უკრაინამ დაანიისგან და ბრიტანეთისგან ხომალდსაწინააღმდეგო სისტემა Harpoon მიიღო. ასევე ზალპური ცეცხლის რეაქტიული სისტემები M142 HIMARS და M270, რომელთა ეფექტური სროლის მანძილში სევასტოპოლიც ექცევა, სადაც რუსეთის შავი ზღვის ფლოტია დისლოცირებული.

უკრაინის საზღვაო ძალების ინფორმაციით, 17 ივლისის მდგომარეობით, შავ ზღვაში მორიგეობს კალიბრის რაკეტების ორი მატარებელი გემი, ხოლო ხმელთაშუა ზღვაში ხუთი.

"აზოვის ზღვაში მტერი აგრძელებს საზღვაო კომუნიკაციების კონტროლს ექვსი გემით და ნავით. რუსეთის ფედერაცია აგრძელებს 1974 წლის ზღვაზე სიცოცხლის უსაფრთხოების საერთაშორისო კონვენციის დარღვევას აზოვის ზღვაში სამოქალაქო გემებზე ავტომატური საიდენტიფიკაციო სისტემების (AIS) გამორთვით", - აღნიშნეს უკრაინის შეიარაღებულ ძალებში.