ახალი ამბები

უკრაინის თავდაცვის მინისტრმა მიხაილო ფედოროვმა 12 თებერვალს, "რამშტაინის" ფორმატში გამართული შეხვედრის შემდეგ განაცხადა, რომ 2026 წელს უკრაინა პარტნიორებისგან 38 მილიარდ დოლარს მიიღებს დრონების, საჰაერო თავდაცვისა და Patriot-ის რაკეტებისთვის. 

ვითარების არსი: "რამშტაინის შედეგების მიხედვით, პარტნიორებმა დაადასტურეს უკრაინის მხარდაჭერის ერთ-ერთი ყველაზე დიდი ბიუჯეტი - 38 მილიარდი დოლარი 2026 წლისთვის. 6 მილიარდ დოლარზე მეტი კონკრეტულ დახმარების პაკეტებშია, მათ შორის: 2.5 მილიარდ დოლარზე მეტი უკრაინული დრონებისთვის, 500 მილიონ დოლარზე მეტი PURL-ისთვის, 2 მილიარდი დოლარი საჰაერო თავდაცვისთვის, ასევე სახსრები საარტილერიო საბრძოლო მასალის, მომზადების, საზღვაო შესაძლებლობებისა და სხვა მიმართულებებისთვის." - აღნიშნა უკრაინის თავდაცვის მინისტრმა.

ჩაშლილად: მან დაასახელა პარტნიორები რა დახმარებას გამოუყოფენ უკრაინას: 

• ბრიტანეთი: გამოყოფს 500 მილიონ ფუნტს საჰაერო თავდაცვისთვის და 150 მილიონ ფუნტს PURL-ის ინიციატივისთვის. ჯამში, 2026 წელს უკრაინის სამხედრო დახმარებისთვის £3 მილიარდს გამოყოფს.
• გერმანია: მინიმუმ 1 მილიარდ ევროს გამოყოფს უკრაინისთვის დრონების შესასყიდად, დააფინანსებს უკრაინის ქალაქების თავზე საჰაერო თავდაცვის "გუმბათის" პროექტს და დრონებით აღჭურვილი მოიერიშე ქვედანაყოფების შექმნას (€11.5 მლრდ-იანი დახმარების ბიუჯეტის ფარგლებში).
• ნორვეგია: 2026 წელს გამოყო 7 მილიარდი დოლარი, საიდანაც 1.4 მილიარდი დრონებზე, 700 მილიონი საჰაერო თავდაცვაზე, 200 მილიონი არტილერიაზე, ხოლო 125 მილიონი PURL-ზე დაიხარჯება.
• ნიდერლანდები: 2026 წელს უკრაინის თავდაცვისთვის მშპ-ს მინიმუმ 0.25%-ს გამოყოფს და PURL-ში 90 მილიონ ევროს შეიტანს.
• ბელგია: სამხედრო დახმარებისთვის გამოყოფს 1 მილიარდ ევროს.
• შვედეთი: დააანონსა დახმარების 24-ე პაკეტი - 1.2 მილიარდი ევრო და 100 მილიონიანი შენატანი PURL-ში. 2026 წელს ჯამში 3.7 მილიარდი ევრო.
• დანია: უკრაინის სამხედრო დახმარებისთვის 2 მილიარდ დოლარს გამოყოფს.
• ესპანეთი: 1.2 მილიარდი დოლარი.
• ლიეტუვა: 2026 წელს 265 მილიონ დოლარს გამოყოფს.
• ლატვია და ესტონეთი: უკრაინის მხარდასაჭერად საკუთარი მშპ-ს არანაკლებ 0.25%-ს გამოყოფენ.
• პორტუგალია: დაეხმარება PURL-სა და "ჩეხურ ინიციატივას," ასევე გადასცემს ჯავშანტექნიკასა და დრონებს SAFE პროგრამით;
• თურქეთი: დააანონსა უკრაინის საჰაერო თავდაცვის გაძლიერებაში მონაწილეობა.

დიდი სურათი: ფედოროვმა ასევე აღნიშნა, რომ უკრაინა ევროპელ პარტნიორებთან შეთანხმდა საწყობებიდან Patriot-ის რაკეტების სასწრაფო მიწოდებაზე.

• "რაოდენობას დავაზუსტებთ პარტნიორი ქვეყნების ხელმძღვანელობის საბოლოო გადაწყვეტილების შემდეგ. ვიმედოვნებთ მიწოდების მაქსიმალურად მოკლე ვადებს," - თქვა მინისტრმა.