ახალი ამბები

ამერიკის შეერთებულმა შტატებმა ბრალი წაუყენა ნავთობის ტანკერის კაპიტანს, რომელიც ამერიკულ ძალებს ატლანტის ოკეანეში რამდენიმე კვირის განმავლობაში გაურბოდა მას შემდეგ, რაც ვენესუელისკენ მიმავალი გზაზე შეაჩერეს. ეს არის პირველი შემთხვევა, როდესაც პრეზიდენტ ტრამპის მიერ ვენესუელის ნავთობზე დაწესებული სანქციების გამკაცრება სისხლისსამართლებრივი პასუხისმგებლობით დასრულდა.

ვითარების არსი: NYT-ის თანახმად კაპიტან ავთანდილ კალანდაძეს ბრალი ორი ფედერალური მუხლით წაუყენეს 12 თებერვლის საბრალდებო დასკვნის მიხედვით, რომელიც აქამდე საჯაროდ არ გავრცელებულა.

• პირველი მუხლი კალანდაძეს ადანაშაულებს ტანკერზე გაიანას დროშის უკანონოდ გამოყენებაში - გემი ამ ქვეყანაში რეგისტრირებული არ ყოფილა - რაც მიზნად ისახავდა 20 დეკემბერს აშშ-ის სანაპირო დაცვის მიერ გემის დაკავების თავიდან აცილებას.

• მეორე მუხლი კალანდაძეს ადანაშაულებს სანაპირო დაცვის ბრძანების დაუმორჩილებლობაში, რომელიც გემის გაჩერებასა და ბორტზე ამერიკული ძალების დაშვებას ითხოვდა.

• ნაცვლად ამისა, გემი (მაშინდელი სახელწოდებით „Bella 1“), რომელიც კარიბის ზღვაში ვენესუელისკენ მიცურავდა, ატლანტის ოკეანისკენ გაბრუნდა და ამერიკული ძალების დევნის ობიექტი გახდა. გზად გემმა სახელი შეიცვალა, დაირქვა „Marinera“ და რუსეთის მფარველობა მოითხოვა. ეკიპაჟმა ტანკერის გვერდზე რუსეთის დროშა დახატა და გემი რუსეთის ოფიციალურ გემების მონაცემთა ბაზაშიც დარეგისტრირდა.

• რუსეთის მთავრობამ დიპლომატიური არხები გამოიყენა და აშშ-ს ტანკერის დევნის შეწყვეტა მოსთხოვა. მიუხედავად ამისა, 7 იანვარს, გაერთიანებულ სამეფოსთან ახლოს, ამერიკული ძალები გემის ბორტზე ავიდნენ და ის დააკავეს, რის შედეგადაც დააპატიმრეს ავთანდილ კალანდაძე და ეკიპაჟის სხვა წევრები.

დიდი სურათი: გემის დაკავება იყო ტრამპის მცდელობის ნაწილი, დაემყარებინა კონტროლი ვენესუელის მრავალმილიარდიან ნავთობინდუსტრიაზე. ამ დრომდე აშშ-ის ძალები ვენესუელის ნავთობით ვაჭრობაში ჩართულ კიდევ რვა სხვა გემის ბორტზე ავიდნენ. აღნიშნული გემები ე.წ. „ჩრდილოვანი ფლოტის“ ნაწილია, რომლებსაც ვენესუელიდან, ირანიდან ან რუსეთიდან ნავთობი მთელ მსოფლიოში გადააქვთ აშშ-ისა და სხვა ქვეყნების მიერ დაწესებული სანქციების დარღვევით.

დეტალები: ამერიკის ხელისუფლებას „Bella 1“-ის დაკავების ორდერი უკვე მოპოვებული ჰქონდა, რადგან გემს ტერორიზმთან დაკავშირებული ჯგუფებისთვის ირანული ნავთობის ტრანსპორტირების ისტორია ჰქონდა. გემის დაკავების შემდეგ, კალანდაძის მეუღლემ, ნათია ძაძამამ, გაერთიანებულ სამეფოში წარუმატებელი სამართლებრივი დავა წამოიწყო და ქმრის დაკავების გადაწყვეტილების გადახედვა მოითხოვა.

• ნათია ძაძამას ადვოკატმა, ამერ ანვარმა, სამშაბათს გაკეთებულ განცხადებაში აღნიშნა, რომ „აშშ-მა კიდევ ერთხელ გამოავლინა სრული უპატივცემულობა კანონის უზენაესობისა და თავისი უახლოესი მოკავშირის, გაერთიანებული სამეფოს წინაშე ნაკისრი საერთაშორისო ვალდებულებების მიმართ“.

• თეთრ სახლს და იუსტიციის დეპარტამენტს კომენტარის თხოვნაზე დაუყოვნებლივი პასუხი არ გაუციათ. გასულ თვეში BBC იტყობინებოდა, რომ აშშ ეკიპაჟის კიდევ ერთი წევრისთვის აპირებდა ბრალის წაყენებას, ხოლო დანარჩენი 26 წევრი გათავისუფლებული იყო.