ახალი ამბები

ნატოს სამი სახელმწიფო - ბულგარეთი, რუმინეთი და თურქეთი - 11 იანვარს, სტამბოლში, შავი ზღვის წყლების ერთობლივი განაღმვის შესახებ შეთანხმების გაფორმებას გეგმავენ.

ამის შესახებ თურქეთის თავდაცვის მინისტრმა იაშარ გიულერმა შაბათს გამართულ პრესკონფერენციაზე განაცხადა.

გიულერმა შავი ზღვის განაღმვაზე უკრაინაში რუსეთის სრულმასშტაბიანი აგრესიის კონტექსტში ისაუბრა და ხაზგასმით აღნიშნა, რომ ანკარა "ფრთხილად, პასუხისმგებლობით და მიუკერძოებლად" იცავს მონტრეს კონვენციას.

"შავ ზღვაში ნაღმების საფრთხის წინააღმდეგ ჩვენი ქვეყნის ხელმძღვანელობით დაწყებული სამმხრივი ინიციატივის ფარგლებში, 22-23 ნოემბერს ჩავატარეთ შავი ზღვის ნაღმების მოქმედების სამუშაო ჯგუფის შეხვედრის მესამე რაუნდი, რომელსაც ჩვენმა სამინისტრომ უმასპინძლა," - აღნიშნა მინისტრმა.

"ხელმოწერის ცერემონიას სტამბოლში 2024 წლის 11 იანვარს ვგეგმავთ, რომელშიც მონაწილეობას სამი ქვეყნის თავდაცვის მინისტრი მიიღებს," - თქვა მან.

რუსეთის სრულმასშტაბიანი აგრესიის კონტექსტში, გიულერმა ასევე იმედი გამოთქვა, რომ "ეს ომი, რომელიც მთელ მსოფლიოს ეხება, რაც შეიძლება მალე დასრულდება" და უკრაინის ტერიტორიული მთლიანობა დაცული იქნება.

უკრაინაში რუსეთის ინტერვენციის დაწყების შემდეგ, რუმინეთის, ბულგარეთის და თურქეთის სამხედრო მყვინთავების გუნდები რეგულარულად ასუფთავებდნენ ნაღმებს, რომლებიც მათ წყლებში შედიოდნენ. ოქტომბერში პირველად გახდა ცნობილი, რომ სამი ქვეყანა განიხილავდა ერთობლივი ძალების შექმნას შავი ზღვის ნაღმებისგან გასაწმენდად.