ახალი ამბები

უკრაინის კონტრშეტევა ნელა მიიწევს წინ, რადგან რუსული თავდაცვითი სიმაგრეების წინ მდებარე ტერიტორიები დანაღმულია. კონტრშეტევის დაწყებამდე, უკრაინამ იმ გამნაღმველი და საინჟინრო აღჭურვილობის 15%-ზე ნაკლები მიიღო, რომელიც დასავლელი პარტნიორებისგან მოითხოვა.

ამის შესახებ The Washington Post წერს.

"ჯარისკაცები ამბობენ, რომ კონტრშეტევისთვის ხანგრძლივმა მომზადებამ რუსებს დრო მისცა მოსამზადებლად. 3-დან 10 მილამდე (დაახლოებით 5-16 კმ - რედ.) სიღრმის ტერიტორიები რუსების მთავარი გამაგრებების წინ ძლიერ იყო დანაღმული ტანკსაწინააღმდეგო და ქვეითსაწინააღმდეგო ნაღმებით და მავთულხლართებით. მათი თქმით, ეს სიმაგრეები წარმატებით აფერხებს უკრაინის შეტევას.

შედეგად, უკრაინელი სამხედროების თქმით, უკრაინულმა ძალებმა შეცვალეს სტრატეგია. იმის ნაცვლად, რომ ქვეითთა ​​საბრძოლო მანქანებით და ტანკებით გარღვევა სცადონ, რომლებიც დასავლელმა მოკავშირეებმა უკრაინას კონტრშეტევისთვის მიაწოდეს, ქვედანაყოფები ნელა, ფეხით მიიწევენ წინ." - ვკითხულობთ სტატიაში.

Washington Post-ის თანახმად, ამ ბრძოლებმა ჯავშანტექნიკის და ტანკების დაუცველობა გამოავლინა - განსაკუთრებით ახლად ჩამოსული ამერიკული Bradley-ის საბრძოლო მანქანები და გერმანული Leopard-ის ტანკები, რომლებსაც ოფიციალური პირები უკრაინისთვის უმთავრეს ძალად მიიჩნევდნენ რუსეთის მიერ ოკუპირებული ტერიტორიის დასაბრუნებლად.

"ამ მანქანებმა ჯარისკაცებისგან დადებითი გამოხმაურება მიიღეს - ნაღმების აფეთქების შემდეგაც კი, მათში მყოფი ადამიანების მხოლოდ მცირე დაზიანებებით უმეტესობა გადარჩა, მაგრამ მათ რუსული თავდაცვის ხაზის გარღვევა დამოუკიდებლად ვერ შეძლეს," - წერს გაზეთი.

უკრაინის შეიარაღებული ძალების მთავარსარდლის, ვალერი ზალუჟნის განცხადებით, უკრაინას სპეციალური დისტანციური აღჭურვილობა სჭირდება განაღმვისთვის. Washington Post-თან ინტერვიუში მან თქვა, რომ უკრაინა იყენებს აშშ-ს მიერ მიწოდებულ M58 MICLIC-ის ნაღმების გაწმენდის სისტემებს, მაგრამ "ისინი ასევე ნადგურდება" და ამიტომ "ბევრი მათგანია საჭირო."

უკრაინელმა მაღალჩინოსანმა, რომელიც გამოცემას ანონიმურობის პირობით ესაუბრა, თქვა, რომ კიევმა იმ გამნაღმველი და საინჟინრო აღჭურვილობის 15%-ზე ნაკლები მიიღო, რაც კონტრშეტევამდე მოითხოვა. მისი თქმით, ამ აღჭურვილობის ნაწილი მხოლოდ გასულ კვირას ჩამოვიდა.

უკრაინის თავდაცვის მინისტრმა ოლექსი რეზნიკოვმა და ვალერი ზალუჟნიმ Washington Post-ს განუცხადეს, რომ მათ დასავლელ კოლეგებს აცნობეს, რომ სასწრაფოდ სჭირდებათ მეტი გამნაღმველი სისტემები, როგორიცაა Bangalore-ის ტორპედოს ასაფეთქებელი მუხტი.

"დანაღმული ველები არის ერთ-ერთი პრობლემა, რომელიც, რა თქმა უნდა, გავლენას ახდენს შეტევის ტემპზე. ეს არის პრობლემა, რომელსაც ჩვენ ვხედავთ. შეიძლებოდა თუ არა მისი გადაჭრა უფრო სწრაფად? შეიძლებოდა. როგორ შეიძლება მოგვარდეს? გენერალმა მილიმ ეს იცის. სხვა საკითხია, შეუძლია თუ არა მას ამაში დახმარება? არ ვიცი." - თქვა ზალუჟნიმ.

ამერიკელმა ოფიციალურმა პირებმა Washington Post-ს უთხრეს, რომ მათ უკრაინას თითქმის ყველა ის აღჭურვილობა მიაწოდეს, რომელსაც ქვეყანა კონტრშეტევის წინა ითხოვდა. ოფიციალურმა პირებმა აღნიშნეს, რომ ყოველთვის არ არის შესაძლებელი იმ ტექნიკის მიწოდება, რომელსაც უკრაინა ითხოვს, მაგრამ განაცხადეს, რომ ვაშინგტონი მუშაობს ასეთი სისტემების მალე მიწოდებაზე.

ოფიციალურმა პირებმა გაზეთს ასევე განუცხადეს, რომ აშშ-ის მიერ უკრაინისთვის კასეტური საბრძოლო მასალების მიწოდება, კიევს საცეცხლე უპირატესობას მისცემს, რაც უკრაინელ სამხედროებს საკმარის დროსა და სივრცეს მისცემს საინჟინრო აღჭურვილობის გამოსაყენებლად.

უკრაინელმა ჯარისკაცებმა, რომლებიც კონტრშეტევაში მონაწილეობდნენ, WP-ს განუცხადეს, რომ გამნაღმველი სისტემების დეფიციტის გამო, ისინი რუსეთის ჯარებისთვის მარტივი სამიზნეები გახდნენ.

როგორც გაზეთი აღნიშნავს, ნაღმების სიღრმე და სიმკვრივე მნიშვნელოვანი პრობლემაა ზაპორიჟიეს რეგიონის სამხრეთ ფრონტის ხაზის გასწვრივ, სადაც რუსები უკრაინელების შეტევას ელოდნენ.

"ამ რაიონში რელიეფი ძირითადად გაშლილი მინდვრებია, სადაც უკრაინელებს ადგილი არ ჰქონდათ თავიანთი დიდი აღჭურვილობისა და მანქანების დასაფარად. ჯარისკაცების თქმით, რუსებმა თავიანთი პოზიციების გასამაგრებლად ბორცვები აირჩიეს," - წერს WP.

უკრაინის შეიარაღებული ძალების 47-ე მექანიზებული ბრიგადის გამნაღმველი დანაყოფების მეთაურმა, ოსკარმა WP-ს განუცხადა, რომ მისმა ჯგუფმა გერმანული გამნაღმველი ჯავშანმანქანა Wisent მიიღო, რომელიც ზაპორიჟიეს რეგიონში კონტრშეტევის დაწყებამდე გამოიყენა. ამ სისტემამ და მსგავსმა საბჭოთა მოდელებმა წარმატებით გაასუფთავეს გარკვეული ბილიკები ბრიგადის პირველი შეტევისთვის.

"მაგრამ ახლა მათი გამოყენება აღარ არის ეფექტური, რადგან მტერი ასეთი აღჭურვილობის გამოჩენას მოელის, რომელიც არის მასიური, ხმაურიანი, ადვილად შესამჩნევი და, შესაბამისად, მათ ბომბავს," - თქვა ოსკარმა.

47-ე ბრიგადის კიდევ ერთმა ოფიცერმა WP-ს განუცხადა, რომ კონტრშეტევის პირველ დღეს, ბრიგადის ზოგიერთმა ქვედანაყოფმა Bradley-ის საბრძოლო მანქანებით და Leopard-ის ტანკებით შეცდომით არასწორი მარშრუტი აირჩია და დანაღმულ ველზე გავიდა განაღმული სივრცის ნაცვლად.

კოლონის წინ, როგორც გაზეთი წერს, იყო ნაღმების გამწმენდი მანქანები, მაგრამ ჯგუფი იძულებული გახდა გაჩერებულიყო, როცა უკან მიმავალი მანქანები მოულოდნელად ნაღმებზე აღმოჩნდენენ. ქაოსმა მანქანების კლასტერი ერთ ადგილას შექმნა. შემდეგ რუსებმა უკრაინელებზე თავდასხმა ვერტმფრენებით და ტანკსაწინააღმდეგო რაკეტებით დაიწყეს, რამაც სერიოზულად დააზიანა და გაანადგურა რამდენიმე ჯავშანტრანსპორტიორი და ტანკი. უკრაინელი ოფიცრის თქმით, ზოგიერთმა ქვედანაყოფმა, რომლებმაც თავიანთი აღჭურვილობა დატოვეს, მაინც მოახერხეს რუსული სანგრების დაკავება.

"როდესაც მტერი მის წინ თუნდაც Leopard-ის ტანკს და სპეციალურ საინჟინრო აღჭურვილობას დაინახავს, ის უპირველეს ყოვლისა სპეცტექნიკას გაანადგურებს, რადგან მის გარეშე სხვები ვერ გაივლიან. შეტევის სულ რამდენიმე დღეში რამდენიმე ასეთი ეკიპაჟი მანქანებთან ერთად განადგურდა," - განაცხადა ოფიცერმა.

იმის გამო, რომ რუსები უპილოტო თვითმფრინავებს ნაღმების გამწმენდი სისტემების მოსაძებნად იყენებენ, რათა მათ არტილერიითა და რაკეტებით დაარტყან, უკრაინელები ცდილობენ ხელით განაღმონ ტერიტორია.

"გამნაღმველი დანაყოფები - ზოგჯერ მხოლოდ ოთხი კაციანი ჯგუფი - ხშირად ელოდება შებინდებისას, რათა ბილიკები გაიწმინდოს, რადგან ისინი ძალიან შესამჩნევი არიან დღის განმავლობაში და სიბნელეში კი მათი დანახვა მხოლოდ ღამის ხედვის მოწყობილობებით არის შესაძლებელია," - ნათქვამია სტატიაში.

მესაზღვრეებმა WP-ს უთხრეს, რომ ლითონის დეტექტორით სიარული არარეალურია, რადგან ისინი ზედმეტად ხილულნი არიან და ამიტომ ცოცავენ და ასე ეძებენ ნაღმებს.

"ეს ძალიან გვანელებს, რადგან გამნაღმველის მუშაობას დრო და სიმშვიდე სჭირდება. ასეთ პირობებში ჩვენი საქმის კეთება შეუძლებელია," - თქვა 128-ე სამთო ბრიგადის საინჟინრო ბატალიონის მეთაურმა, ვიცე-პოლკოვნიკმა ნიკოლაი მოროზმა.

გარდა ამისა, გაზეთი წერს, რომ რუსები დრონებიდან ნაღმებს იმ ტერიტორიებზე ყრიან, რომლებიც უკრაინელებმა გაასუფთავეს და ის პოზიციები, რომლებთანაც უკრაინელები მიაღწევენ, შესაძლოა უკვე დანაღმულია.

გამოცემის ცნობით, იმის გამო რომ უკრაინელი ჯარისკაცები ფეხით მოძრაობენ და არა ახალი დასავლური ჯავშანტექნიკით, საბრძოლო მასალის მიწოდება და დაჭრილების ევაკუაცია გართულდა.