ახალი ამბები

უკრაინა ყველაფერს აკეთებს დონეცკის ოლქის ქალაქ მარიუპოლის მშვიდობიანი მოსახლეობისა და დამცველების მხარდასაჭერად. ამის შესახებ საგარეო საქმეთა მინისტრმა დიმიტრი კულებამ 14 აპრილს კიევში გამართულ ბრიფინგზე განაცხადა.

მან ხაზგასმით აღნიშნა, რომ მარიუპოლი მძიმე მდგომარეობაშია.

"ძალიან მტკივნეულია მარიუპოლიდან სიახლეების მიღება, ჩვენ ყველაფერს ვაკეთებთ მშვიდობიანი მოსახლეობისა და მარიუპოლის დამცველების დასახმარებლად. მაგრამ მარიუპოლის განბლოკვისა და ხალხის გადასარჩენად, ჩვენ გვჭირდება მეტი იარაღი და ჩვენ ვმუშაობთ პარტნიორებთან მათ მოსაპოვებლად. თუ უკრაინა არ მიიღებს ყველა საჭირო იარაღს რამდენიმე დღეში და არა კვირებში, ეს ნიშნავს, რომ დაიღუპება მეტი მშვიდობიანი მოქალაქე, ჩადენილი იქნება მეტი სისასტიკე და უფრო მეტი უკრაინული სოფელი და ქალაქი განადგურდება რუსული შეტევის შედეგად." - თქვა უკრაინის საგარეო საქმეთა მინისტრმა.

მარიუპოლი აზოვის ზღვის სანაპიროზე მდებარე უდიდესი საპორტო ქალაქია. მარიუპოლისთვის ბრძოლები 24 თებერვლიდან დაიწყო, როცა უკრაინაში რუსული ჯარების ფართომასშტაბიანი შეჭრა დაიწყო. რუსულმა ჯარებმა ვერ შეძლეს ქალაქის შტურმით აღება და დაიწყეს მისი მასოვრივი საჰაერო, საარტილერიო იარაღიდან და სარაკეტო სისტემებით დაბომბვა.