ახალი ამბები

საფრანგეთის პრეზიდენტმა ემანუელ მაკრონმა განაცხადა, რომ უკრაინა 2 მილიარდი ევროს ღირებულების სამხედრო დახმარებას მიიღებს.

ამის შესახებ საფრანგეთის პრეზიდენტმა 26 მარტს, პარიზში ჩატარებულ პრესკონფერენციაზე ისაუბრა.

მაკრონმა თქვა, რომ უკრაინის მოკავშირეებმა ახლა უნდა განიხილონ მისი არმიის "ყველაზე დაუყოვნებელი მხარდაჭერა."

"დღეს მსურს გამოვაცხადო უკრაინის სამხედრო მხარდაჭერის ახალი პაკეტი 2 მილიარდი ევროს ოდენობით," - აღნიშნა მან. "პაკეტი უნდა აკმაყოფილებდეს უკრაინის არმიის პრიორიტეტულ საჭიროებებს."

პაკეტი მოიცავს ტანკსაწინააღმდეგო რაკეტებს, საჰაერო თავდაცვის სისტემებს, რაკეტებს Mirage-ის გამანადგურებლებისთვის და VAB AMX-10 RX-ის ჯავშანმანქანებს.

"ეს არის ჭურვები, მათ შორის დისტანციურად მართვადი ჭურვები. და ეს არის ასევე აღჭურვილობის წარმოება უკრაინაში ჩვენს თავდაცვის საწარმოებთან პარტნიორობით," - განაცხადა საფრანგეთის ლიდერმა.

მარტის დასაწყისში საფრანგეთის თავდაცვის მინისტრმა სებასტიან ლეკორნუმ გამოაცხადა, რომ სურს გამოიყენოს რუსეთის ფედერაციის გაყინული აქტივების მოგება უკრაინის სამხედრო დახმარების პაკეტის მოსამზადებლად, რომლის ღირებულებაც 195 მილიონი ევრო იქნება.

გარდა ამისა, ემანუელ მაკრონმა განმარტა, რომ უკრაინაში დასავლური სამშვიდობო კონტინგენტის გაგზავნის იდეა არ გულისხმობს სამხედროების უშუალოდ ფრონტის ხაზზე განლაგებას.

"რას ნიშნავს ეს? იქნება კონტიგენტები უკრაინის ეროვნულ ბაზებზე. ეს დამოკიდებულია იმ ქვეყნებზე, რომლებიც მზად იქნებიან გაგზავნონ ასეთი კონტიგენტები, რათა უზრუნველყონ ეს "მეორე ეშელონის" ტერიტორიები სამშვიდობო ზონაში. ანუ ისინი არ იქნებიან ფრონტის ხაზზე და არ იქნებიან, ასე ვთქვათ, პირველ ხაზზე," - განმარტა საფრანგეთის პრეზიდენტმა.

მაკრონის თქმით, ეს არის "მნიშვნელოვანი შემაკავებელი ძალები," რომლებიც განლაგდებიან უკრაინაში "სტრატეგიულ ადგილებში" და შეძლებენ უკრაინელი სამხედროების დამატებით მომზადებას და "გარკვეული ლოგისტიკის უზრუნველყოფას."