ახალი ამბები

იტალიის საწარმოთა და წარმოების მინისტრმა ადოლფო ურსომ, მიგრანტების შემოდინებისა და კუნძულ ლამპედუზაზე დაძაბული სიტუაციის გამო, ევროკავშირს დახმარებისკენ მოუწოდა.

ამის შესახებ მან ლამპედუზაში იმ ადგილების მონახულების შემდეგ განაცხადა, სადაც ყველაზე მეტი მიგრანტი ჩადის.

"სიტუაცია ლამპედუზაში ყველასთვის აშკარაა და სწორედ ევროპაა, ვინც იტალიას ამ პრობლემის მოგვარებაში უნდა დაეხმაროს," - თქვა ურსომ.

მან აღნიშნა, რომ ლამპედუზაში ვითარება არასტაბილურია და გამოსავალი უნდა მოიძებნოს, რათა მიგრანტების რაოდენობა შემცირდეს.

მინისტრმა ასევე განაცხადა, რომ საჭიროა მიგრანტების სიტუაციის მართვის არსებული კანონმდებლობის კიდევ უფრო გაძლიერება.

მანამდე ცნობილი გახდა, რომ წინა დღეებში ლამპედუზაში არალეგალი მიგრანტების რეკორდული რაოდენობა ჩავიდა.

ლამპედუზა იტალიის ყველაზე სამხრეთი კუნძულია, რომელიც აფრიკის სანაპიროდან 140 კილომეტრში მდებარეობს, რაც მას მიგრანტებისთვის პოპულარულ ადგილად აქცევს, რომლებიც ევროპაში ხმელთაშუა ზღვის გავლით მიემგზავრებიან.

აპრილის შუა რიცხვებში იტალიამ საგანგებო მდგომარეობა გამოაცხადა ხმელთაშუა ზღვით შემოსული მიგრანტების რაოდენობის მკვეთრი ზრდის გამო.

მიგრაციის საერთაშორისო ორგანიზაციის პროექტის შეფასებით, 2022 წელს ჩრდილოეთ აფრიკიდან ევროპისკენ მიმავალ გზაზე დაახლოებით 3 800 ადამიანი დაიღუპა, რაც 2017 წლის შემდეგ ყველაზე მეტია.