ახალი ამბები

მომდევნო დღეებში გაიმართება სომხეთისა და თურქეთის სპეციალური წარმომადგენლების შეხვედრა, რომლის მთავარი თემაც საზღვრის გახსნა და ქვეყანებს შორის ურთიერთობების შემდგომი ნორმალიზაცია იქნება. 

ვითარების არსი: ინფორმაციას ამის შესახებ დიპლომატიურ წრეებში საკუთარ წყაროებზე დაყრდნობით თურქული გამოცემა NTV ავრცელებს - ეს ბოლო წლების განმავლობაში საზღვრის გახსნის საკითხზე მხარეებს შორის პირველი შეხვედრაა. 

• წყაროების ცნობით, თურქეთის დელეგაციას სომხეთის ურთიერთობებთან საკითხებში სპეციალური წარმომადგენელი, სერდარ კილიჩი უხელმძღვანელებს. 
  
  
• შეხვედრის გეგმას ადასტურებენ სომხეთის საგარეო საქმეთა სამინისტროშიც - მოსალოდნელია რომ მიღებული იქნება ახალი, კონკრეტული გადაწყვეტილებები ურთიერთობების ნორმალიზაციის კუთხით. 
  
  
• საყურადღებოა, რომ შეხვედრა ერევანში გაიმართება, ხოლო თურქული დელეგაცია სომხეთში სახმელეთო საზღვრის (ალიჯან-მარგარა გამშვები პუნქტი) გავლით ჩავა. 
  
  
• სომხეთის საგარეო უწყების ცნობით, დელეგაციას თურქეთთან ურთიერთობების საკითხში სპეციალური წარმომადგენელი რუბენ რუბინიანი უხელმძღვანელებს. 
  
  

კონტექსტი: თურქეთსა და სომხეთს შორის დიპლომატიური ურთიერთობები არ არსებობს, ხოლო საზღვარი ანკარას გადაწყვეტილებით 1993 წლის შემდეგ ჩაკეტილია. 

• ურთიერთობების ნორმალიზაციის პირველი მცდელობა 2008 წელს დაიწყო. უკვე 2009 წელს, ციურიხში საგარეო საქმეთა მინისტრებმა ხელი მოაწერას პროტოკოლებს დიპლომატიური ურთიერთობების დაწესებისა და განვითარების შესახებ. 
  
  
• წარმოქმნილი უთანხმოებების ფონზე პროცესი 2010 წელს შეჩერდა, ხოლო უკვე 2015 წელს სომხეთის იმდროინდელმა პრეზიდენტმა თურქეთთან ურთიერთობების ნორმალიზაციის პროტოკოლები სომხეთის პარლამენტიდან უკან გაიწვია. 2018 წელს პროცესი საბოლოოდ შეწყდა. 
  
  

სტრიქონებს შორის: ერევანსა და ანკარას შორის ურთიერთობების ნორმალიზაციის პროცესი ყარაბაღის მეორე ომის დასრულების შემდეგ, 2021 წლიდან განახლდა. 

• 2022 წელს თურქეთისა და სომხეთის შესაბამისმა დელეგაციებმა 4 შეხვედრა გამართეს. ამავე წლის თებერვლიდან ქვეყნებს სორის აღდგა პირდაპირი საჰაერო მიმოსვლა,  დაიდო შეთანხმება საზღვრის მესამე ქვეყნების მოქალაქეების, სახმელეთო და საჰაერო ტვირთებისთვის გახსნის შესახებაც. 
  
  
• კომენტატორების შეფასებით, თურქეთსა და სომხეთს შორის საზღვრის გახსნა დაკავშირებული იქნება სომხეთსა და აზერბაიჯანს შორის ურთიერთობების საბოლოო ნორმალიზაციაზე.