ახალი ამბები

ისრაელის პრემიერ-მინისტრმა ბენიამინ ნეთანიაჰუმ შეერთებულ შტატებს განუცხადა, რომ ისრაელი მზადაა დაბომბოს ირანის სამხედრო ობიექტები და არა ბირთვული ან ნავთობის ობიექტები.

ამის შესახებ Washington Post ამ საკითხზე ინფორმირებულ ორ ოფიციალურ პირზე დაყრდნობით წერს.

ნეთანიაჰუ ბაიდენს გასულ კვირას ტელეფონით ესაუბრა, რათა ირანზე საპასუხო დარტყმა განეხილათ.

1 ოქტომბერს ირანმა ისრაელისკენ 200-მდე ბალისტიკური რაკეტა გაუშვა. ამ თავდასხმის მიზანი ისრაელის მიერ ჰეზბოლას ლიდერების უმრავლესობის, მათ შორის ჰასან ნასრალას მკვლელობაზე პასუხის გაცემა იყო. ისრაელის საჰერო თავდაცვამ, აშშ-ის მხარდაჭერით, რაკეტების უმრავლესობის ჩამოგდება შეძლო. თავდასხმას ისრაელში მსხვერპლი არ მოჰყოლია, ხოლო ოკუპირებულ დასავლეთ სანაპიროზე რაკეტის ნამსხვრევის ჩამოვარდნის შედეგად ერთი პალესტინელი დაიღუპა.

გამოცემასთან საუბარში აშშ-ის მთავრობის წარმომადგენელმა განაცხადა, რომ ნეთანიაჰუ დათანხმდა თავდასხმის ისე დაგეგმვას, რომ გავლენა არ მოახდინოს აშშ-ის მომავალ არჩევნებზე; ენერგეტიკულ ობიექტებზე თავდასხმამ შესაძლოა ნავთობის ფასები გაზარდოს, რაც ზიანს მიაყენებს ვიცე-პრეზიდენტ კამალა ჰარისის შანსებს ამომრჩევლების მიმართ, რომლებიც უკმაყოფილო არიან ბენზინზე მაღალი ფასებით.

ოფიციალური პირის თქმით, ისრაელის ირანზე საპასუხო თავდასხმას 5 ნოემბრის არჩევნებამდე გეგმავს, რათა თავიდან აიცილოს სისუსტის აღქმა.