ახალი ამბები

რუსმა მფრინავმა და Z-ბლოგერმა ალექსეი ზემცოვმა ვიდეო გამოაქვეყნა, სადაც "ოფიცრის უკანასკნელი ღირსების გამოყენების უფლებას" ითხოვს.

რასთან გვაქვს საქმე: "თუ თქვენ უყურებთ ამ ვიდეოს, ე.ი. მე აღარ ვარ". - ამბობს მიმართვაში მფრინავი.

• ამ დროისთვის არ არსებობს მტკიცებულება, რომ ზემცოვმა სიცოცხლე თვითმკვლელობით დაასრულა.
  
  
• ვიდეოში ზემცოვი ჰყვება, რომ 2023 წლამდე საბრძოლო ფრენებში მონაწილეობდა. იმავე წლის სექტემბერში მან საკუთარი Telegram არხი - "Voevoda Veshchaet" შექმნა, რაც "ძალიან არ მოეწონა" გენერალ-ლეიტენანტ ვლადიმირ კრავჩენკოს, რომელიც დღეს რუსეთის საჰაერო-კოსმოსური ძალების მთავარსარდლის მოადგილის თანამდებობას იკავებს.
  
  
• არხში გამოქვეყნებული კრიტიკული შეხედულებების გამო, ზემცოვი ფრენებიდან მოხსნეს. ამის შემდეგ, ზემცოვის თქმით, კრავჩენკომ მას საავადმყოფოში წასვლა და, შემდგომში, სამხედრო სამსახურიდან გათავისუფლების შესახებ პატაკის დაწერა ურჩია.
  
  
• მფრინავის თქმით, კრავჩენკომ მას "აპატია შეცდომები". ზემცოვი სხვა სამხედრო ნაწილში გადაიყვანეს.

ჩაშლილად: 2025 წელს ზემცოვმა შეიტყო, რომ მის მეუღლეს Telegram-არხის ადმინისტრატორთან სასიყვარულო კავშირი ჰქონდა. მფრინავის თქმით, მან ცოლის საყვარელი ტყეში წაიყვანა და მას ფიზიკურად გაუსწორდა.

• ამ ინციდენტის გამო, ზემცოვს ოთხნახევარი თვით პატიმრობა მიესაჯა.
  
  
• 2026 წლის გაზაფხულზე პოლკოვნიკმა ავრამენკომ ზემცოვი იზოლატორიდან გამოიყვანა და შემტევ ქვედანაყოფში განაწესა.
  
  
• 4 აპრილს მფრინავმა სოციალურ ქსელში პოსტი გამოაქვეყნა, რომელშიც რუსული ჯარის უხარისხო აღჭურვილობაზე გაამახვილა ყურადღება.
  
  
• ზემცოვის თქმით, მას პოსტის წაშლა მოსთხოვეს, რაზეც უარი განაცხადა.
  
  
• ავრამენკომ ბლოგერის პატიმრობაში დაბრუნების გადაწყვეტილება მიიღო. ზემცოვის აზრით, ამ გადაწყვეტილების უკან კრავჩენკო დგას.
  
  
• "მე ასეთ სირცხვილს ვერ ავიტან. ვარ რუსული არმიის ოფიცერი". - ამბობს ვიდეოში ზემცოვი.

სიღრმისეულად: გარდა ამისა, ზემცოვმა რუსეთის გენერალურ პროკურორს გამოძიების დაწყების თხოვნით მიმართა.

• ვიდეოში მფრინავი მაყურებელს უჩვენებს შავი ფერის საქაღალდეს, რომელშიც, მისი თქმით, კრავჩენკოს შესახებ "საკმაოდ მგრძნობიარე ინფორმაცია" ინახება.
  
  
• თავისი Telegram-არხის მართვა ზემცოვმა Z-ბლოგერ კირილ ფედოროვს გადასცა.
  
  
• ამ დროისთვის არხს 170 000 გამომწერი ჰყავს.