ახალი ამბები

საბერძნეთის სააპელაციო სასამართლომ "მოლდოვის დემოკრატიული პარტიის" ყოფილი ლიდერის, ვლადიმირ პლაჰოტნიუკის ექსტრადიცია დასაშვებად ცნო.

State Of Play: სასამართლოს გადაწყვეტილებით, ოლიგარქი მოლდოვას უნდა გადასცენ. ამის შესახებ 28 აგვისტოს, მოლდოვური გამოცემა Point.md წერს.

• მოლდოველი ოლიგარქი სხდომაზე იძულებით მიიყვანეს. მანამდე ის დაჟინებით მოითხოვდა, რომ მისი ექსტრადიციის შესახებ გადაწყვეტილება დაუსწრებლად განეხილათ.
• "სასამართლოს ეს გადაწყვეტილება პლაჰოტნიუკის მოლდოვაში დაბრუნების პროცესის მოსალოდნელი ეტაპია, სადაც ის ადგილობრივ სასამართლოებში აპირებს თავის დაცვას და მის წინააღმდეგ აღძრულ საქმეებზე ახსნა-განმარტების მიცემას," - ციტირებს გამოცემა ოლიგარქის ადვოკატის სიტყვებს.
• ვლადიმირ პლაჰოტნიუკი და ყოფილი დეპუტატი კონსტანტინ ცუცუ ივლისში ათენის აეროპორტში, დუბაის რეისზე ჩასხდომისას დააკავეს.
• ZdG-ს ცნობით, მოლდოვის მოქალაქეების ჯგუფი საბერძნეთში სატრანზიტო მიზნით ჩავიდა. არაოფიციალური ინფორმაციით, პლაჰოტნიუკი და ცუცუ ყალბი სახელებით მოგზაურობდნენ.  

Big Picture: პლაჰოტნიუკი საერთაშორისო ძებნაშია და ევროკავშირისა და აშშ-ის სანქციების სიაშია. ოლიგარქი "მოლდოვის დემოკრატიულ პარტიას" ხელმძღვანელობდა, რომელიც ხელისუფლებაში 2016-დან 2019 წლამდე იყო.

• გარდა ამისა, ის პარლამენტის დეპუტატი და ქვეყნის ერთ-ერთი უმდიდრესი ადამიანი იყო.
• პლაჰოტნიუკი მოლდოვიდან 2019 წლის ზაფხულში გაიქცა - მაია სანდუს ხელისუფლებაში მოსვლისთანავე. 
• ამის შემდეგ მან დატოვა პარტიის თავმჯდომარის თანამდებობა და დეპუტატის მანდატი.
• 2019 წლის ოქტომბერში მოლდოვის სამართალდამცავმა ორგანოებმა პლაჰოტნიუკის ქონება და საბანკო ანგარიშები დააყადაღეს. 
• მოლდოვის პროკურატურამ მის წინააღმდეგ რამდენიმე სისხლის სამართლის საქმე აღძრა, მათ შორის თაღლითობის, ფულის გათეთრების, დანაშაულებრივი ჯგუფის ორგანიზებისა და ხელმძღვანელობის, უკანონო გამდიდრების მუხლებით. ამ ბრალდებების საფუძველზე, სასამართლომ პლაჰოტნიუკის დაპატიმრების გადაწყვეტილება მიიღო.

Context: ოლიგარქის წინააღმდეგ რამდენიმე სისხლის სამართლის საქმეა აღძრული რუსეთშიც. 2019 წლის ნოემბერში მოსკოვის ტვერსკოის სასამართლომ მას დაუსწრებლად, ორი თვით პატირმობა მიუსაჯა.