სირიის მთავრობამ ისრაელის საზღვართან მოქმედი "ჰეზბოლას" წევრები დააკავა
სირიის გარდამავალი მთავრობის შინაგან საქმეთა სამინისტრომ განაცხადა, რომ დააკავეს "ჰეზბოლას დაჯგუფებასთან დაკავშირებული ტერორისტული ქსელი," რომელიც დამასკოს დასავლეთით მდებარე ქალაქებში მოქმედებდა.
ვითარების არსი: სასა და კანაკერი დამასკოს გარეუბნიდან დაახლოებით 16 კილომეტრში მდებარეობს.
- სირიული გამოცემა "ალ-იხბარიას" ცნობით, დამასკოს გარეუბნის გუბერნიის შიდა უსაფრთხოების ძალების მეთაურმა, ბრიგადის გენერალმა აჰმედ ალ-დალატიმ "განმარტა, რომ ტერორისტული უჯრედის წევრები სპეციალიზებულ ქვედანაყოფებთან და გენერალური დაზვერვის სამსახურთან თანამშრომლობით დააპატიმრეს, მჭიდრო მონიტორინგისა და ინტენსიური საველე სამუშაოების შემდეგ."
- დალატი ცოტა ხნის წინ დაინიშნა დამასკოს გარეუბნის ამ ტერიტორიის მეთაურად, მანამდე ის დრუზებით დასახლებულ სუვეიდას პროვინციაში უსაფრთხოებას ხელმძღვანელობდა.
- "ჰეზბოლას" წევრების დაპატიმრება დალატის დამასკოს ტერიტორიაზე გადაყვანის შემდეგ მისი ერთ-ერთი პირველი ქმედებაა.
ჩაშლილად: "ალ-დალატის თქმით, პირველადი გამოძიებით დადგინდა, რომ ქსელის წევრებმა წვრთნები ლიბანის ტერიტორიაზე მდებარე ბანაკებში გაიარეს და გეგმავდნენ ოპერაციების ჩატარებას სირიის ტერიტორიაზე, რაც საფრთხეს შეუქმნიდა მოქალაქეთა უსაფრთხოებასა და სტაბილურობას."- წერს სირიული გამოცემა.
- ოპერაციის დროს სირიის ძალებმა რაკეტების გამშვების დანადგარები, Grad-ის ტიპის 19 რაკეტა, ტანკსაწინააღმდეგო რაკეტები, ინდივიდუალური იარაღი და დიდი რაოდენობით სხვადასხვა საბრძოლო მასალა ამოიღეს.
- მეთაურმა "აღნიშნა, რომ საქმე შესაბამის უწყებებს გადაეცა შემდგომი სამართლებრივი მოქმედებებისთვის, შესაბამისი სამსახურები კი აგრძელებენ გამოძიებას, მათი კავშირებისა და მიზნების დადგენას."
კონტექსტი: ივლისში, ისრაელის თავდაცვის ძალებმა გოლანის მახლობლად ირანთან დაკავშირებული ძალების წინააღმდეგ ორი რეიდი განახორციელეს.
- როდესაც სირიას ასადის რეჟიმი მართავდა, გოლანის მახლობლად "ჰეზბოლასთან" დაკავშირებული ბევრი მებრძოლი მოქმედებდა.
- სირიის ახალმა მთავრობამ "ჰეზბოლას" ირანიდან შეიარაღების მიღების გზები გადაუკეტა.
- თუმცა, ისრაელი სამხრეთ სირიის დემილიტარიზაციას ითხოვს. ეს სირიის ძალებს ბევრად ასუსტებს დარაას პროვინციასა და სუვეიდაში. დარაა გოლანის მახლობლად მდებარეობს.
