ახალი ამბები

აშშ-ის პრეზიდენტმა დონალდ ტრამპმა განაცხადა, რომ აპირებს შემოიღოს 50%-იანი საბაჟო გადასახადი კანადური წარმოების ყველა თვითმფრინავზე და შეწყვიტოს მათი სერტიფიცირება შეერთებულ შტატებში. 

ვითარების არსი: Bloomberg-ის ცნობით, ეს გადაწყვეტილება ტრამპმა ახსნა კანადის უარით, კომპანია Gulfstream-ის ბიზნეს-ჯეტების ექსპლუატაციის დამტკიცებაზე.

• "იმის გათვალისწინებით, რომ კანადა უსაფუძვლოდ, უკანონოდ და ჯიუტად ამბობს უარს Gulfstream 500, 600, 700 და 800-ის სერტიფიცირებაზე, რომლებიც ერთ-ერთი საუკეთესო და მაღალტექნოლოგიური თვითმფრინავებია, რაც კი ოდესმე შექმნილა, ჩვენ ვუუქმებთ სერტიფიკაციას Bombardier Global Express-ის თვითმფრინავებს, ისევე როგორც კანადაში დამზადებულ ყველა საჰაერო ხომალდს მანამ, სანამ Gulfstream, ეს გამორჩეული ამერიკული კომპანია, სრულად არ იქნება სერტიფიცირებული, როგორც ეს ჯერ კიდევ წლების წინ უნდა მომხდარიყო. თუ რაიმე მიზეზით ეს სიტუაცია დაუყოვნებლივ არ გამოსწორდა, მე ვაპირებ კანადას დავაკისრო 50%-იანი გადასახადი აშშ-ში გაყიდულ ნებისმიერ თვითმფრინავზე." - დაწერა ტრამპმა სოციალურ ქსელში.

ჩაშლილად: გამოცემის მონაცემებით, ამ გადაწყვეტილებას შესაძლოა კრიტიკული შედეგები მოჰყვეს ამერიკული ავიაკომპანიებისთვის. კერძოდ, ავიაკომპანია American Airlines 200-მდე რეგიონულ Bombardier CRJ-ს იყენებს, ხოლო Delta Air Lines-ის პარტნიორები — 150-ზე მეტ ასეთ ხომალდს.

• ანალიტიკოსები აღნიშნავენ, რომ სერტიფიცირების გაუქმების მუქარის აღსრულებამ შესაძლოა აშშ-ში მსხვილი კორპორაციებისა და კერძო პირების კუთვნილი დაახლოებით 3000 თვითმფრინავისთვის ფრენების აკრძალვა გამოიწვიოს.
• ამასთან, კომპანია Bombardier-ის გაყიდვების 64% 2024 წელს სწორედ ამერიკულ ბაზარზე მოდიოდა.
• "არ ვიცი რა არის ეს ან საიდან მოდის, მაგრამ პრეზიდენტის მხრიდან უსაფრთხოების საკითხებსა და სერტიფიცირებაში ჩარევა იმაზე მეტად ცუდი იდეაა, ვიდრე წარმოგიდგენიათ," - განაცხადა ავიაციის ანალიტიკოსმა რიჩარდ აბულაფიამ.

დიდი სურათი: ეს ქვეყნებს შორის სავაჭრო ურთიერთობების მორიგი გამწვავებაა. მანამდე ტრამპი კანადურ საქონელზე 100%-იანი ტარიფის დაწესებით დაიმუქრა ოტავასა და პეკინს შორის სავაჭრო შეთანხმების გამო.

• თეთრმა სახლმა ასევე უკმაყოფილება გამოხატა კანადის პრემიერ-მინისტრის, მარკ კარნის დავოსის მსოფლიო ეკონომიკურ ფორუმზე გამოსვლის გამო, სადაც მან ტრამპის ეკონომიკური პოლიტიკა გააკრიტიკა.
• გარდა ამისა, ვაშინგტონი უკმაყოფილოა კანადასა და ჩინეთს შორის მიღწეული შეთანხმებით, რომლის მიხედვითაც ოტავა შეამცირებს ტარიფებს ჩინურ ელექტრომობილებზე (რომლებიც მან აშშ-სთან ერთად 2024 წელს დააწესა), სანაცვლოდ კი პეკინი შეამცირებს გადასახადებს კანადურ სასოფლო-სამეურნეო პროდუქციაზე.

კონტექსტი: ამჟამად აშშ და კანადა ჩრდილოამერიკული სავაჭრო შეთანხმების (USMCA) გადახედვისთვის ემზადებიან, რომელიც ტრამპის პირველი საპრეზიდენტო ვადის დროს გაფორმდა.