ახალი ამბები

25 ათასზე მეტი სირიელი თურქეთიდან სამშობლოში დაბრუნდა მას შემდეგ, რაც ბაშარ ალ-ასადი ისლამისტების მეთაურობით აჯანყებულებმა დაამხეს.

ამის შესახებ თურქეთის შინაგან საქმეთა მინისტრმა ალი ერლიკაიამ სამშაბათს განაცხადა.

თურქეთში თითქმის 3 მილიონი სირიელი ლტოლვილი ცხოვრობს, რომლებიც 2011 წელს დაწყებული სამოქალაქო ომის შემდეგ გაიქცნენ და რომელთა ყოფნაც პრობლემას წარმოადგენდა პრეზიდენტ რეჯეფ თაიფ ერდოღანის მთავრობისთვის.

"ბოლო 15 დღის განმავლობაში სირიაში დაბრუნებულთა რიცხვმა 25 ათასს გადააჭარბა," - განაცხადა ალი ერლიკაიამ.

ანკარა მჭიდრო კავშირშია სირიის ახალ ხელისუფლებასთან და ახლა ყურადღებას ამახვილებს სირიელი ლტოლვილების ნებაყოფლობით დაბრუნებაზე, იმ იმედით, რომ დამასკოში ხელისუფლების ცვლილება ბევრ მათგანს სახლში დაბრუნების საშუალებას მისცემს.

ერლიკაიამ განაცხადა, რომ დამასკოსა და ალეპოში თურქეთის საელჩოსა და საკონსულოში შეიქმნება მიგრაციის განყოფილება, რომელიც შექმნის დაბრუნებული სირიელების რეესტრს.

ასადის რეჟიმის დამხობიდან ერთი კვირის შემდეგ, თურქეთის საელჩომ დამასკოში მუშაობა განაახლა. თურქეთის დიპლომატიურმა მისიამ მუშაობა 12 წლის წინ, სამოქალაქო ომის დაწყებისას შეწყვიტა.

ერლიკაიას თქმით, 2025 წლის 1 იანვრიდან ივლისის ჩათვლით, ერდოღანის მითითებით შემუშავებული წესების მიხედვით, თითო ოჯახის წევრს ქვეყანაში სამჯერ შესვლისა და გასვლის უფლება ექნება. სირიელები, რომლებიც სახლში დაბრუნდებიან, შეძლებენ თავიანთი ნივთების წაღებას.

აშშ-ის სახელმწიფო მდივანმა ენტონი ბლინკენმა ადრე დაადასტურა, რომ ამერიკული მხარე უშუალო კონტაქტებს ინარჩუნებს სირიელ მეამბოხე დაჯგუფება ჰაიათ თაჰრირ აშ-შამთან.

ასევე გავრცელდა ინფორმაცია, რომ ევროკავშირს სირიის ახალ ხელისუფლებასთან პირდაპირი კონტაქტის დამყარება სურს.