ახალი ამბები

უკრაინის პრეზიდენტმა პირველად გამოხატა მზაობა დონეცკის ოლქის ჯერ კიდევ უკრაინული არმიის მიერ კონტროლირებული ნაწილში დემილიტარიზებული ზონის შექმნის შესახებ, მხოლოდ იმ შემთხვევაში თუ რეგიონიდან ჯარებს რუსეთიც გაიყვანს. 

ვითარების არსი: ამის შესახებ ვოლოდიმირ ზელენსკიმ კიევში ჟურნალისტებთან ურთიერთობისას ისაუბრა - ღონისძიების ფარგლებში უკრაინელმა პრეზიდენტმა მედიას ტრამპის ადმინისტრაციასთან შეთანხმებული 20-პუნქტიანი სამშვიდობო გეგმა გააცნო. 

• გეგმის მიხედვით, უკრაინა გამოთქვამს მზაობას განიხილოს დონბასში დემიტარიზებული, სპეციალური ეკონომიკური ზონა, მათ შორის არამხოლოდ იმ რაიონებში, რომლიდანაც უკრაინული ჯარები გავლენ, არამედ იმ დასახლებებშიც, რომელსაც რუსეთის საოკუპაციო არმია დატოვებს. 
  
  
• უკრაინელმა პრეზიდენტმა ხაზი გაუსვა, რომ უკრაინის მხრიდან ნებისმიერი მოცულობის ტერიტორიიდან გასვლას უნდა მოყვეს საოკუპაციო არმიის სარკისებური ზომები. 

ჩაშლილად: ჯერჯერობით უცნობია, თუ ჯამურად რამხელა ტერიტორიაზეა საუბარი, თუმცა ზელენსკის თქმით, დონეცკში დემილიტარიზებულმა ზონამ შეიძლება სლოვიანსკი-კრამატორსკის აგლომერაცია მოიცავს - უკრაინული არმიის მიერ კონტროლირებადი უმსხვილესი ქალაქები. 

• გეგმის მიხედვით, დემილიტარიზებული ზონა პრაქტიკულად ბუფერის ფუნქციას შეასრულებს და ადმინისტრირებული იქნება საერთაშორისო ძალების მიერ. 
  
  
• ამასთანავე ზელენსკიმ ხაზი გაუსვა, რომ ამ საკითხის გადაწყვეტა შეუძლებელი იქნება რეფერენდუმის გარეშე. 

დიდი სურათი: გეგმის მიხედვით, საოკუპაციო არმია დატოვებს მიკოლაივის, ხარკივის, სუმის და დნეპროპეტროვსკის ოლქებს, ხოლო ხერსონისა და ზაპორიჟიის ოლქებში ფრონტი არსებულ ხაზებზე გაიყინება. 

• გეგმა ასევე ითვალისწინებს პოტენციური შეთანხმების შემდეგ არჩევნებისა და შესაბიმისი რეფერენდუმის მაქსიმალურად სწრაფად ჩატარებას. 

კონტექსტი: საყურადღებოა, რომ საუბარია უკრაინასა და ამერიკის შეერთებულ შტატებს შორის შეთანხმებულ დოკუმენტზე, რომელზეც კრემლის პოზიცია ჯერჯერობით უცნობია. 

• ამავე გამოსვლაში ზელენსკიმ განაცხადა, რომ დღის მიწურულს იგეგმება ვაშინგტონისა და მოსკოვის კონტაქტი. 
  
  
• თავის მხრივ, დმიტრი პესკოვმა განაცხადა, რომ დღეს ვლადიმირ პუტინს საჯარო გამოსვლებით დატვირთული დღე ექნება და რამდენიმე ღონისძიება გვიან ღამით გაიმართება.