ახალი ამბები

"ექსტრემისტების" საქმის პირველი სასამართლო სხდომის დღეს, რუსმა ოპოზიციონერმა ალექსეი ნავალნიმ გამოაცხადა, რომ "ომისა და პუტინის წინააღმდეგ" კამპანიას იწყებს.

თავისი ინიციატივის შესახებ ოპოზიციონერმა სოციალურ ქსელში 19 ივნისს დაწერა.

პოლიტიკოსის თქმით, მისი მხარდამჭერები აპირებენ "გრძელი, ჯიუტი, დამქანცველი, მაგრამ ფუნდამენტურად მნიშვნელოვანი კამპანიის" ჩატარებას, რათა ხალხი ომისა და მასთან დაკავშირებული ყველაფრის წინააღმდეგ გამოიყვანონ.

"იმ ჩიხის წინააღმდეგ, რომელშიც პუტინი ასე გიჟურად და სულელურად აღმოჩნდა 2022 წლის 24 თებერვალს: სიკვდილი, დანაკარგი, მობილიზაცია, ომის დანაშაულები, იზოლაცია, სანქციები, ათიათასობით დაღუპული და მილიონობით წასული. ეკონომიკის დეგრადაცია და ცხოვრების დონის დაცემა, მეომარი კრიმინალები და მობილიზებული მათხოვრები," - აღნიშნა ნავალნიმ.

ოპოზიციონერს პოტენციურად დიდი აუდიტორიის იმედი აქვს.

"ხუთიდან ერთს ჰყავს ამ ომში დაღუპული ნათესავები ან მეგობრები. სამწუხაროდ, ეს რიცხვები კიდევ უფრო გაიზრდება, რაც საზოგადოების ცნობიერებას შეცვლის," - აღნიშნავს ის.

მისი თქმით, ამას ემატება სახლში დაბრუნებული ათიათასობით დაჭრილი, დაშავებული და ასიათასობით მობილიზებული, რომლებმაც ყველაფერი საკუთარი თვალით ნახეს: "არაკომპეტენტური ქურდი-გენერალებიდან დაწყებული ყველაფრის ნაკლებობამდე – წინდებიდან ჭურვებამდე."

პოლიტიკოსი აპირებს ომის წინააღმდეგ კამპანიის "საარჩევნო კამპანიის კანონებისა და ტექნოლოგიების მიხედვით ჩატარებას - ყველას გამოკითხვა, ასობით სხვადასხვა სამიზნე ჯგუფის, თითოეულის მიმართ განსხვავებული მიდგომის არჩევა, ვინც ყოყმანობს და მათი დარწმუნება."

ნავალნის თქმით, ასეთი სამუშაოსთვის აქტივი უკვე არსებობს.

"მოდი წარმოვიდგინოთ, მილიონნახევარი, ვინც წავიდა ომისა და მობილიზაციის დაწყებიდან, მილიონნახევარი, ვინც წავიდა 2014 წლის შემდეგ და მილიონი, რომელიც დარჩა რუსეთში, მაგრამ არ ეშინოდა, ყოველი მეათე შეუერთდება ომის წინააღმდეგ კამპანიას, შემდეგ კი თვეში ოთხასი ათას აგიტატორიანი არმია 12 მილიონ მოქალაქეს დაფარავს," - აღნიშნავს ოპოზიციონერი. 

ის თვლის, რომ "ასეთი სიძლიერის სააგიტაციო მანქანა ქვეყანაში საზოგადოებრივ განწყობას 3-4 თვეში რადიკალურად შეცვლის."