ახალი ამბები

ოთხშაბათს გამართულ ვირტუალურ შეხვედრაზე პრეზიდენტმა ტრამპმა G7-ის წევრი ქვეყნების ლიდერებს განუცხადა, რომ ირანი „დანებების ზღვარზეა“. ინფორმაციას ამის შესახებ Axios-ს სამი ოფიციალური პირი აწვდის, რომლებიც საუბრის შინაარსს იცნობენ.

ამ განცხადებიდან ზუსტად 24 საათში, ირანის ახალმა უზენაესმა ლიდერმა პირველი საჯარო მიმართვა გაავრცელა, სადაც ბრძოლის გაგრძელების პირობა დადო.

რატომ არის მნიშვნელოვანი: ტრამპი ომის შედეგებში ისეთივე თავდაჯერებულია კულუარებში, როგორც საჯაროდ. თუმცა, მისი ოპტიმისტური შეფასებები მკვეთრად ეჯახება რეალობას - ომის მე-14 დღეს ირანის რეჟიმი კოლაფსის ნიშნებს არ ამჟღავნებს და ჰორმუზის სრუტის ბლოკირებით დასავლეთზე ზეწოლას აძლიერებს.

კულუარებში: G7-ის ლიდერებთან საუბრისას ტრამპმა ოპერაცია „Epic Fury“-ს შედეგებით იტრაბახა: „მე მოვიშორე კიბო, რომელიც ყველას გვემუქრებოდა“.

• პრეზიდენტმა იქვე დასძინა, რომ თეირანში, სავარაუდოდ, აღარავინ დარჩა ცოცხალი, ვისაც დანებების შესახებ გადაწყვეტილების მიღება შეუძლია: „არავინ იცის, ვინ არის მათი ლიდერი, ამიტომ კაპიტულაციასაც ვერავინ აცხადებს“, - ციტირებენ წყაროები ტრამპის სიტყვებს.

• ირანის ახალ ლიდერს, მოჯთაბა ხამენეის, ტრამპმა „მსუბუქი წონის ფიგურა“ უწოდა. მიუხედავად ამისა, სწორედ ხამენეი უმცროსი დაიმუქრა ხუთშაბათს „ახალი ფრონტების“ გახსნით იქ, სადაც მტერი ყველაზე მოწყვლადია.

დეტალები: საუბრის მთავარი თემა ომის ეკონომიკური შედეგები იყო. ნავთობის ფასმა ბარელზე 100 დოლარს გადააჭარბა, რამაც გლობალური კრიზისის შიში გააჩინა.

• მოკავშირეების პოზიცია: გერმანიის კანცლერმა ფრიდრიხ მერცმა, ბრიტანეთის პრემიერმა კირ სტარმერმა და საფრანგეთის პრეზიდენტმა ემანუელ მაკრონმა ტრამპს ომის სასწრაფოდ დასრულებისკენ მოუწოდეს.

• ტრამპის პასუხი: პრეზიდენტმა აღნიშნა, რომ ვითარება უმჯობესდება და სავაჭრო გემებს ნავიგაციის აღდგენისკენ მოუწოდა. თუმცა, იმავე ღამეს ერაყის სანაპიროსთან კიდევ ორ ტანკერს გაუჩნდა ცეცხლი.

• ბუნდოვანი ვადები: წყაროების თქმით, ტრამპი ბუნდოვანი იყო ომის დასრულების თარიღთან დაკავშირებით. მან მხოლოდ ის თქვა, რომ „საქმე ბოლომდეა მისაყვანი“, რათა 5 წელიწადში ახალი ომი არ გახდეს საჭირო.

რუსული ფაქტორი: ევროპელი ლიდერები განსაკუთრებით შეშფოთებულნი არიან იმით, რომ ირანის კრიზისით რუსეთი ხეირობს. მათ ტრამპს მოუწოდეს, არ დაუშვას მოსკოვისთვის სანქციების შემსუბუქება.

• მიუხედავად ამისა, სულ რამდენიმე საათში ცნობილი გახდა, რომ პუტინის წარმომადგენელი ფლორიდაში ტრამპის მრჩევლებსა და ჯარედ კუშნერს შეხვდა. ამის შემდეგ კი აშშ-მა რუსულ ნავთობზე სანქციების ერთთვიანი „პაუზა“ გამოაცხადა, რაც თეთრი სახლის თქმით, ბაზრების სტაბილიზაციას ემსახურება.

ინტრიგა: საუბრისას ტრამპმა ბრიტანეთის პრემიერ-მინისტრს, კირ სტარმერსაც დასცინა. თავდაპირველად სტარმერმა აშშ-ს ირანზე იერიშებისთვის ბრიტანული ბაზების გამოყენებაზე უარი უთხრა, თუმცა მოგვიანებით პოზიცია შეცვალა.

• ტრამპმა მას G7-ის სხვა ლიდერების თანდასწრებით მიმართა: „ეს ომის დაწყებამდე უნდა შემოგეთავაზებინა - ახლა უკვე გვიანია, შენი დახმარება აღარ მჭირდება“.

სიღრმისეულად: ენერგოკრიზისის ფონზე, აშშ რუსული ნავთობის შესყიდვაზე 30-დღიან ნებართვას გასცემს