ახალი ამბები

ისრაელის თავდაცვის მინისტრი ისრაელ კაცი აცხადებს, რომ "ჰეზბოლას" გენერალური მდივანი ნაიმ ყასემი ლეგიტიმური სამიზნეა მას შემდეგ, რაც ტერორისტულმა დაჯგუფებამ ღამით ისრაელის მიმართულებით რაკეტები და დრონები გაუშვა.

ვითარების არსი: "ტერორისტული ორგანიზაცია 'ჰეზბოლა' დიდ ფასს გადაიხდის ისრაელის დაბომბვისთვის. ნაიმ ყასემი, რომელმაც ირანის ზეწოლის ქვეშ მიიღო ცეცხლის გახსნის გადაწყვეტილება, ამიერიდან ლიკვიდაციისთვის მონიშნული სამიზნეა," - დაწერა კაცმა სოციალურ ქსელ X-ზე.

• მან აღნიშნა, რომ ვინც ირანის ყოფილი უზენაესი ლიდერის, შაბათს მოკლული ალი ხამენეის "გზას გაჰყვება," მალე მასთან ერთად "ჯოჯოხეთის უფსკრულში აღმოჩნდება ბოროტების ღერძის სხვა განადგურებულ წევრებთან ერთად."

ჩაშლილად: ორშაბათს, გამთენიისას, ლიბანიდან გაშვებული რაკეტებისა და დრონების გამო ისრაელის ჩრდილოეთში განგაშის სირენები ამუშვდა. ტერორისტული დაჯგუფება "ჰეზბოლა" საბრძოლო მოქმედებებში ჩაერთო, რათა სოლიდარობა გამოეცხადებინა მისი მთავარი დამფინანსებლისა და იდეოლოგიური პარტნიორის, ირანის მიმართ.

• დაჯგუფების იერიშებს, რომელიც, მათი თქმით, შაბათს აშშ-ის და ისრაელის მიერ ალი ხამენეის მკვლელობის გამო შურისძიება იყო, ისრაელის მხრიდან მყისიერი პასუხი მოჰყვა მთელი ლიბანის მასშტაბით, მათ შორის ბეირუთში.
• ღამის პირველ საათზე სირენები ჩართო ისრაელის ქალაქ ჰაიფასა და მიმდებარე ტერიტორიებზე. ისრაელის თავდაცვის ძალებმა მალევე დაადასტურეს, რომ თავდახმა არა ირანიდან, არამედ ლიბანიდან მოდიოდა. ისრაელელი სამხედროების განცხადებით, საჰაერო თავდაცვამ ერთი რაკეტა ჩამოაგდო, ხოლო მინიმუმ ორი ღია ადგილას დაეცა. ზემო გალილეაში ასევე ჩამოაგდეს ორი საეჭვო დრონი.
• დაზიანებებისა და მსხვერპლის შესახებ ინფორმაცია არ გავრცელებულა.

სტრიქონებს შორის: "ჰეზბოლამ" პასუხისმგებლობა აიღო "ზუსტი რაკეტებისა და დრონების გუნდის" გაშვებაზე და განაცხადა, რომ ეს იყო "შურისძიება მუსლიმთა უზენაესი ლიდერის, ალი ხამენეის სისხლის გამო."

• შიიტურმა დაჯგუფებამ თავდასხმა მას შემდეგ დაიწყო, რაც "ჰეზბოლას" ლიდერმა ნაიმ ყასემმა პირობა დადო, რომ მისი დაჯგუფება ისრაელსა და აშშ-ს დაუპირისპირდებოდა, მიუხედავად ლიბანის მთავრობის თხოვნისა, რომ ორგანიზაცია კონფლიქტის მიღმა დარჩენილიყო, როგორც ეს 2025 წლის ივნისის 12-დღიანი ომის დროს მოხდა.
• თუმცა, "ჰეზბოლამ" ეს თხოვნა უგულებელყო. 

დიდი სურათი: ისრაელის თავდაცვის ძალების ცნობით, ათობით დარტყმა განხორციელდა ბეირუთსა და სამხრეთ ლიბანში "ჰეზბოლას" შტაბ-ბინებსა და ინფრასტრუქტურაზე.  

• "ჩვენ მოვემზადეთ მრავალფრონტიანი სცენარისთვის და 'ჰეზბოლას' წინააღმდეგ შეტევითი კამპანიისთვის. ნებისმიერი მტერი, რომელიც ჩვენს უსაფრთხოებას დაემუქრება, დიდ ფასს გადაიხდის," - განაცხადა ისრაელის თავდაცვის ძალების შტაბის უფროსმა, გენერალმა ზამირმა.
• ისრაელმა ასევე გამოსცა საევაკუაციო გაფრთხილება სამხრეთ ლიბანის ათობით სოფლის მოსახლეობისთვის. ბეირუთის სამხრეთ გარეუბანში, დაჰიეში, რომელიც "ჰეზბოლას" საყრდენია, 12-ზე მეტი აფეთქება მოხდა - ეს იყო ყველაზე ინტენსიური დარტყმები 2024 წლის ომის შემდეგ.
• მოსახლეობა მასობრივად ტოვებს სახლებს, სკოლები და თავშესაფრები კი დევნილების მისაღებად გაიხსნა.