ახალი ამბები

ზაპორიჟიეს რეგიონის ოკუპირებული ტოკმაკის მიდამოებში, რუსეთმა იმპროვიზირებული კაშხალი ააშენა და წყალდიდობა გამოიწვია. მათი მიზანი უკრაინის კონტრშეტევის შეჩერებაა.

შესაბამისი ინფორმაცია, თანამგზავრულ სურათებთან ერთად, Bellingcat-მა გაავრცელა. 

სატელიტური გამოსახულებები აჩვენებს, რომ უკრაინის ჯარების კონტრშეტევის წინა დღეს, რუსეთმა ოკუპირებული ტოკმაკის მიმდებარე ტერიტორიაზე კაშხალი შექმნა.

წითელი ხაზი სავარაუდო ფრონტის ხაზს გვიჩვენებს, ხოლო მწვანე ხაზი, ღია წყაროების მიხედვით, რუსეთის თავდაცვით ხაზებს აჩვენებს. იმპროვიზირებული კაშხალი ტოკმაკის გარშემო არსებული თავდაცვითი ხაზის ფარგლებში მდებარეობს, რომელიც თავის მხრივ რამდენიმე სხვა თავდაცვითი ხაზის უკან მდებარეობს.

Bellingcat იუწყება, რომ მაისის დასაწყისში კაშხლის აშენების შემდეგ, მდინარე ტოკმაჩკა მნიშვნელოვნად გაფართოვდა ქალაქის აღმოსავლეთით და დატბორა კაშხლის მახლობლად მდებარე ზოგიერთი ველი. ეს 6 ივნისს Planet Labs-ის მაღალი რეზოლუციის SkySat-ის სურათებზეც დაფიქსირდა, რომლებიც აჩვენებს, რომ კაშხალი ფართო ქვიშის ბარიერს წარმოადგენს, რომ პატარა მდინარე შეაკავოს.

კაშხალზე საბურავების კვალი მიუთითებს იმაზე, რომ ის შესაძლოა ხიდის ფუნქციასაც ასრულებდეს.

მარჯვნივ წყალი გროვდება და ახლომდებარე მინდვრებზე მიედინება. ხიდის მარცხნივ, გამოსახულების ცენტრში ჩანს ყვითელი ქვიშის ბარიერი. 

Bellingcat ხაზს უსვამს, რომ რუსეთი უკრაინის კონტრშეტევისთვის ქვეყნის სამხრეთში რამდენიმე თვე ემზადებოდა. მრავალფენიანი თავდაცვა შედგება დანაღმული ველების რამდენიმე ხაზისგან, ტანკსაწინააღმდეგო თხრილებისგან, ბეტონის ბარიერებისგან და თხრილებისგან, რომლებიც ფრონტის მთელ ხაზს დიდ სიღრმეზე ფარავს.

მდინარე ტოკმაჩკაში წყლის დონის ამაღლება შეიძლება იყოს უკრაინის შეიარაღებული ძალების წინსვლის შეჩერების უფრო დიდი გეგმის ნაწილი. კერძოდ, ქალაქთან უკრაინული ჯარების გარღვევის შემთხვევაში ტოკმაკის აღმოსავლეთიდან ალყაში მოქცევის თავიდან ასაცილებლად.

თუმცა, კაშხლის ზომის გათვალისწინებით, წყალდიდობა უმნიშვნელო იქნება და არც კი მიუახლოვდება ნოვაია კახოვკას მასშტაბებს.