ახალი ამბები

ამერიკელ პრეზიდენტთან გამართულ რიგით მეექვსე სატელეფონო საუბარში ვლადიმირ პუტინმა განაცხადა, რომ რუსეთი არ იტყვის უარს თავის მიზნებზე უკრაინაში, რაც კონფლიქტის პირველადი მიზეზების მოგვარებას გულისხმობს. 

State Of Play: ამის შესახებ პრეზიდენტების საუბრის დასრულების შემდეგ, საგარეო საკითხებში ვლადიმირ პუტინის თანაშემწემ, იური უშაკოვმა განაცხადა - საუბარი თითქმის 1 საათი გრძელდებოდა. 

• "პუტინმა განუცხადა პრეზიდენტ ტრამპს, რომ რუსეთი არ იტყვის უარს საკუთარ მიზნებზე, რომელიც უკრაინასთან კონფლიქტის პირველადი მიზეზების მოგვარებას გულისხმობს"- ამბობს უშაკოვი. 
  
  
• მისივე თქმით, პრეზიდენტებს არ უსაუბრიათ უკრაინისთვის ამერიკული სამხედრო დახმარების დაპაუზებაზე - ასევე არ განხილულა უკრაინასთან მოლაპარაკებების მესამე რაუნდის თარიღიც, თუმცა მისი თქმით, ფორმატი არ შეიცვლება და კვლავ ორმხრივი იქნება.
  
  
• "საუბარმა ერთ ტალღაზე ჩაიარა, ეს იყო გულწრფელი, პირდაპირი, საქმიანი და კონკრეტული საუბარი"- ამბობს უშაკოვი. 

Big Picture: უშაკოვის თქმით, პრეზიდენტმა ტრამპმა კიდევ ერთხელ წამოაყენა საომარი მოქმედებების დაუყოვნებლივ შეწყვეტის საკითხი. 

• "თავის მხრივ, ვლადიმირ პუტინმა აღნიშნა, რომ ჩვენ ვაგრძელებთ კონფლიქტის პოლიტიკური, დიპლომატიური მოგვარების გზებს. პუტინმა ასევე მიაწოდა ინფორმაცია სტამბოლში უკრაინასთან მიღწეული შეთანხმებების რეალიზიაციაზე"- ამბობს უშაკოვი.

Context: უშაკოვის თქმით, პუტინმა ასევე აღნიშნა რუსეთის როლი "ამერიკული სახელმწიფოს ჩამოყალიბებაში" არამხოლოდ დამოუკიდებლობის ომის, არამედ სამოქალაქო ომის დროსაც. 

• უშაკოვის თქმით, პუტინმა ტრამპს მოახსენა, რომ მასთან სატელეფონო საუბრის დაწყებამდე ბიზნეს წრეებს ხვდებოდა, სადაც გაჟღერდა კინო პროდუქციის გაცვლის იდეა, რომელიც "ტრადიციულ ფასეულობებს" ეხება - "ტრამპს მყისიერი რეაქცია ჰქონდა და განაცხადა, რომ ეს იდეა მასთან იმპონირებს."
  
  
• უშაკოვის თქმით, ასევე განიხილეს ირანისა და ზოგადად ახლო აღმოსავლეთის თემატიკა და მათ შორის მიღწეულია თანხმობა რამდენიმე ერთობლივი ენერგეტიკული და კოსმოსური პროექტის შესახებ. 
  
  
• უშაკოვის თქმით, ტრამპისა და პუტინის ურთიერთობა მომავალშიც გაგრძელდება.