ახალი ამბები

ჰამასის შინაგან საქმეთა სამინისტროს განცხადებით, ისრაელთან კოლაბორაციაში ბრალდებული ორი პალესტინელი მამაკაცი ღაზას სექტორში სიკვდილით დასაჯეს.

განცხადებაში არ არის დასახელებული ამ ადამიანების ვინაობა - მხოლოდ მათი ინიციალები და ასაკია მითითებული, მაგრამ ნათქვამია, რომ მათ ისრაელს მიაწოდეს ინფორმაცია, რამაც პალესტინელების მკვლელობა გამოიწვია.

გარდა ამისა, ღაზაში მკვლელობის ბრალდებით კიდევ სამი ადამიანი დასაჯეს სიკვდილით.

2007 წლიდან, როდესაც ჰამასმა ღაზას კონტროლი დაიწყო, ტერორისტულმა ორგანიზაციამ მინიმუმ 27 ადამიანი დასაჯა სიკვდილით, ბოლოს ეს 2017 წლის აპრილში მოხდა.

ისრაელის სასარგებლოდ ჯაშუშობაში ბრალდებული ორი მამაკაცი 2009 და 2015 წლებში დააკავეს. "სასამართლომ ისინი ღალატისა და უცხო მხარეებთან შეთქმულებისთვის გაასამართლეს", ნათქვამია შინაგან საქმეთა სამინისტროს განცხადებაში.

ოთხი ბრალდებული ჩამოახრჩვეს, ერთი კი დახვრიტეს, რადგან ის პოლიციელი იყო.