ირანი: დავაკავეთ მოსადის 10 აგენტი, რომლებიც ჩინოვნიკების მანქანებსა და სახლებს წვავდნენ
ირანის ხელისუფლებამ დასავლეთ აზერბაიჯანის პროვინციაში ისრაელის სასარგებლოდ მომუშავე 10 აგენტი დააკავა. ამის შესახებ ინფორმაციას ორშაბათს ირანული მედია ავრცელებს.
ნახევრად ოფიციალური საინფორმაციო სააგენტო Fars წერს, რომ დაკავებულმა პირებმა ოპერაციები ჩაატარეს ირანის უშიშროების ჩინოვნიკების წინააღმდეგ და კონტაქტში იყვნენ მოსადის სადაზვერვო სააგენტოსთან.
"მათ ცეცხლი წაუკიდეს უსაფრთხოების აპარატთან დაკავშირებული ადამიანების მანქანებსა და სახლებს და მიიღეს ფული ფოტოების გადაღებისთვის, რომელიც მათ გაუგზავნეს მოსადის აგენტებს", - ნათქვამია განცხადებაში.
ირანი დროდადრო აცხადებს იმ ადამიანების დაკავების შესახებ, რომლებიც, მისი თქმით, ჯაშუშობენ უცხო ქვეყნებისთვის, მათ შორის შეერთებული შტატებისა და ისრაელისთვის, ასეთი ბრალდების დამადასტურებელი მტკიცებულებების გარეშე.
ირანის ლიდერებმა ასევე განაცხადეს, რომ სახალხო არეულობები მთელ ქვეყანაში, ქალების ჩაგვრის წინააღმდეგ, ორკესტრირებულია ისრაელისა და აშშ-ს მიერ.
ორი კვირის წინ ირანმა განაცხადა, რომ სამხრეთ კერმანის პროვინციაში ბიზნესმენის მანტიაში შემოსილი "სიონისტი ჯაშუში" დააკავა.
პროკურორები ამტკიცებდნენ, რომ ჯაშუში კერმანში "უსაფრთხოების შელახვას" გეგმავდა, სანამ ისლამური რევოლუციის გვარდიის კორპუსის წევრები დაიჭერდნენ. მათი თქმით, ეჭვმიტანილი ასევე გეგმავდა ისრაელის აგენტთან შეხვედრას ახლომდებარე ქვეყანაში, რათა ახალი მისია მიეღო.
