ახალი ამბები

უკრაინა გეგმავს გერმანული Leopard 2-ის მინიმუმ ორი ბატალიონის შექმნას. ამის შესახებ უკრაინის თავდაცვის მინისტრმა ალექსეი რეზნიკოვმა 20 თებერვალს განაცხადა, მას УНИАН ციტირებს.

"დარწმუნებული ვარ, Leopard 2-ის ტანკების მინიმუმ ორი ბატალიონი შეიქმნება. ჩვენ ასევე გვექნება ექვსი ან შვიდი Leopard 1-ის ბატალიონი. ეს იქნება კოალიცია. სხვადასხვა ქვეყანა უზრუნველყოფს ამ Leopard 1-ის ტანკებს." - თქვა რეზნიკოვმა. "და ასევე იქნება Challenger 2-ის და Abrams-ის ტანკები და AMX-10-ის მსუბუქი ტანკები საფრანგეთიდან."

უკრაინის თავდაცვის მინისტრმა იმედი გამოთქვა, რომ უკრაინა Leopard 2-ებს აპრილამდე მიიღებს.

რეზნიკოვმა თქვა, რომ გერმანული ტანკების მიწოდება დამოკიდებული იქნება უკრაინული ეკიპაჟების მომზადების დროზე.

უკრაინის საგარეო საქმეთა სამინისტრომ 31 იანვარს განაცხადა, რომ პირველ ეტაპზე უკრაინა მოკავშირეებისგან 140-მდე თანამედროვე ტანკს მიიღებს, "სატანკო კოალიციაში" ახლა 12 ქვეყანაა.

უკრაინელმა სამხედროებმა Leopard 2-ზე სწავლება გერმანიაში 13 თებერვალს დაიწყეს. ასევე, წვრთნები ტარდება პოლონეთსა და დიდ ბრიტანეთში.