ახალი ამბები

Starlink-ის ინტერნეტ ტერმინალებს უკრაინისთვის მხოლოდ პოლონეთი აფინანსებს და არა ამერიკელი მილიარდერი და SpaceX-ის აღმასრულებელი დირექტორი ილონ მასკი.

ამის შესახებ პოლონეთის საგარეო საქმეთა მინისტრმა რადოსლავ სიკორსკიმ 10 ოქტომბერს, პრესკონფერენციაზე განაცხადა.

სიკორსკის თქმით, ერთ-ერთი მთავარი ფაქტორი, რომელიც უკრაინელებს საშუალებას აძლევს გააგრძელონ რუსებისგან თავის ეფექტურად დაცვა, არის ინტერნეტთან დაკავშირება Starlink-ის ტერმინალების გამოყენებით.

"ეს Starlink ტერმინალები, რომლებიც უკრაინაში გამოიყენება, არ არის ბატონი მასკის დაფინანსებული, ფინანსდება ექსკლუზიურად პოლონეთის მიერ, ამას ჩვენ ვაკეთებთ და არა ვინმე სხვა." - აღნიშნა საგარეო საქმეთა მინისტრმა.

მაისში უკრაინის ვიცე-პრემიერმა და ციფრული ტრანსფორმაციის მინისტრმა მიხაილო ფედოროვმა განაცხადა, რომ პოლონეთი გააგრძელებს Starlink-ის 20 ათასზე მეტი ტერმინალის ფუნქციონირების გადახდას, რომლებიც ვარშავამ უკრაინას გადასცა.

იმავე თვეში, პენტაგონმა განაცხადა, რომ მან ხელი შეუშალა რუს სამხედროებს Starlink-ის ინტერნეტ ტერმინალების უნებართვოდ გამოყენებაში.

ივნისში აშშ-ის თავდაცვის დეპარტამენტმა გაახანგრძლივა კონტრაქტი SpaceX-თან Starlink-ის ინტერნეტ სერვისების უკრაინაში კიდევ ექვსი თვით უზრუნველსაყოფად.