უკრაინის სასაზღვრო სამსახური: რუსებთან ერთად, გვიტევდა ბელარუსის არმიაც
უკრაინის სასაზღვრო სამსახურის ინფორმაციით დილის საათებში ომის დაწყების მომენტიდან, რუსს სამხედროებთან ერთად შეტევაში მონაწილეობას იღებდა ბელარუსის არმიაც.
სასაზღვრო სამსახურის ინფორმაციით, შეტევები ხასიათდებოდა მძიმე არტილერიული ცეცხლით, ბრძოლები მიმდინარეობს ლუჰანსკის, ხარკოვის და ჟიტომირის ოლქებში.
_________________________________________________
რუსეთის პრეზიდენტმა 24 თებერვლის დილით, თბილისის დროით დილის შვიდ საათზე უკრაინაში მასშტაბური ინტერვენციის დაწყება გამოაცხადა.
პუტინმა კიევის წინააღმდეგ სამხედრო აგრესიის მიზნად "უკრაინის დემილიტარიზაცია და დენაციფიკაცია" გამოაცხადა.
უკრაინაში აფეთქებები გაისმა კიევში, მარიუპოლში, ხარკოვში, ნიკოლაევში, ხერსონესში.
ვრცელდება უკრაინული პოზიციების "გრადების" ზალპური ცეცხლით დაბომბვის ვიდეოკადრები.
ოდესაში და აზოვის ზღვის ნაპირზე რუსეთის ფლოტმა სადესანტო ოპერაციები დაიწყო.
დროებით დაიხურა ხარკოვის, დნეპრის, ზაპოროჟიის აეროპორტები.
პუტინის განცხადებამდე ცოტა ხნით გავრცელდა ლუჰანსკის და დონეცკის სეპარატისტი ლიდერების მიმართვები, რომლებშიც მათ რუსეთისგან "უკრაინული აგრესიის მოგერიებაში" დახმარება მოითხოვეს.
უკრაინის პრეზიდენტმა ვოლოდიმირ ზელენსკიმ განაცხადა, რომ პუტინთან დაკავშირება სცადა, თუმცა - უშედეგოდ.
