ახალი ამბები

გაერთიანებული სამეფოს ახალმა პრემიერ-მინისტრმა ენდი ბერნემმა ვოლოდიმირ ზელენსკისთან შეხვედრაზე განაცხადა, რომ ლონდონი, მოკავშირეებთან ერთად, მზად არის ცეცხლის შეწყვეტის შეთანხმების ძალაში შესვლის შემდეგ უკრაინაში სამხედრო კონტინგენტი გააგზავნოს.

პრემიერ-მინისტრის სიტყვებს გამოცემა The Independent ავრცელებს.

რა თქვა: "ჩვენ 100%-ით უკრაინის გვერდით ვართ. პირადად მე 100%-ით თქვენთან ვარ, ბატონო პრეზიდენტო (მიმართავს ზელენსკის). სრულად შევასრულებ ყველა ვალდებულებას, რაც ჩვენმა ქვეყანამ უკრაინის წინაშე იკისრა". - განაცხადა ბერნემმა.

• პრემიერმა ასევე დაადასტურა, რომ დიდი ბრიტანეთი უკრაინას გადასცემს რადიოელექტრონული ბრძოლის სისტემა Stone Cloak-ის ლიცენზიას, რომელიც უპილოტო საფრენი აპარატების აღმოჩენისგან დასაცავად არის განკუთვნილი.
• ბერნემის თქმით, ლონდონი მხარს უჭერს უკრაინას "სრული ცეცხლის შეწყვეტის მიღწევაში".
• "ჩვენ დაგეხმარებით მშვიდობის შენარჩუნებაში. ჩვენ გავაგრძელებთ მსურველთა კოალიციის სათავეში დგომას მოკავშირეებთან ერთად და როდესაც ზავი საბოლოოდ შევა ძალაში, მზად ვიქნებით განვათავსოთ მრავალეროვნული ძალები გრძელვადიან პერსპექტივაში უკრაინის უსაფრთხოების განმტკიცებისთვის". - თქვა ბერნემმა.

კონტექსტი: ზელენსკისა და ბერნემის შეხვედრა 27 ივლისს, ქალაქ პორტსმუთის საზღვაო ბაზაზე, ავიამზიდ HMS Queen Elizabeth-ზე გაიმართა.

• უკრაინის პრეზიდენტი პირველი უცხოელი ლიდერი გახდა, რომელიც ბრიტანეთის ახალმა პრემიერმა თანამდებობის დაკავების შემდეგ მიიღო.
• გაერთიანებული სამეფოს ხელისუფლებამ უკრაინაში ჯარების გაგზავნის მზადყოფნის შესახებ - შესაძლო ცეცხლის შეწყვეტის შეთანხმების უსაფრთხოების გარანტიების უზრუნველსაყოფად - პირველად 2025 წლის დასაწყისში განაცხადა. ამის შესახებ მაშინდელმა პრემიერ-მინისტრმა კირ სტარმერმა ისაუბრა.
• 2026 წლის იანვარში ზელენსკიმ, სტარმერმა და საფრანგეთის პრეზიდენტმა ემანუელ მაკრონმა ხელი მოაწერეს დეკლარაციას ომის დასრულების შემდეგ უკრაინაში ჯარების გაგზავნის შესახებ.
• დოკუმენტში საუბარი იყო მრავალეროვან ძალებზე, რომლებსაც უსაფრთხოების გარანტიები უნდა უზრუნველეყოთ, თუმცა მათი რაოდენობა არ დასახელებულა.