ახალი ამბები

ფინეთის პრეზიდენტმა ალექსანდრ სტუბმა განაცხადა, რომ ჩინეთი რუსეთს არ მისცემს ბირთვული იარაღის გამოყენების უფლებას უკრაინაში ომის ესკალაციისთვის.

ვითარების არსი: Politico-სთან ინტერვიუში სტუბმა აღნიშნა, რომ ჩინეთის მთავრობის წარმომადგენლებმა პირად საუბრებში დაარწმუნეს, რომ რუსეთს ბირთვული იარაღის გამოყენების საშუალებას არ მისცემენ.

• "ამ ზაფხულს ჩინეთის საგარეო საქმეთა მინისტრი ეწვია ჩემს რეზიდენციას და მე ეს საკითხი წამოვჭერი. მან მიპასუხა, რომ ჩვენ არასდროს დავუშვებთ ამას. და მე მიმაჩნია, რომ ეს საკმაოდ ეფექტური შემაკავებელი ფაქტორია," - განაცხადა სტუბმა.
• ჩინეთის საგარეო საქმეთა მინისტრი ვან ი სტუბს ჰელსინკიში 5 ივლისს შეხვდა. განსახილველ საკითხებს შორის იყო რუსეთის სრულმასშტაბიანი შეჭრა უკრაინაში და ევროპული უსაფრთხოება. ჩინეთი მოსკოვის ერთ-ერთ უმნიშვნელოვანეს ეკონომიკურ და დიპლომატიურ პარტნიორად ითვლება.

სტრიქონებს შორის: ფინეთის პრეზიდენტმა ასევე აღნიშნა, რომ მოსკოვი სარგებელს იღებს იმით, რომ ევროპელები კონცენტრირებული არიან ბირთვული ესკალაციის ან ნატოზე პირდაპირი თავდასხმის პერსპექტივაზე.

• "რუსეთს სურს, რომ ჩვენ, ევროპელები, ვიხსდეთ აქ და განვიხილავდეთ: მოახდენს თუ არა რუსეთი კონფლიქტის ესკალაციას? გამოიყენებს თუ არა რუსეთი ბირთვულ იარაღს? დაესხმება თუ არა რუსეთი თავს ნატოსა და ევროპას?" - თქვა სტუბმა.
• მან ხაზი გაუსვა, რომ ევროპელებმა უნდა შეინარჩუნონ სიმშვიდე, თავშეკავება და სიფხიზლე: "არ არის საჭირო დრამატიზება, მოემზადეთ უარესისთვის, რათა თავიდან აიცილოთ იგი."

დიდი სურათი: ინტერვიუში მან ასევე გააფანტა შიშები ნატოზე რუსეთის გარდაუვალი თავდასხმის შესახებ და აღნიშნა, რომ ეს არის "უფრო გაღიზიანების მცდელობა," ვიდრე ომისთვის მზადება. სტუბის თქმით, რუსული ჯარები კვლავ უკრაინაში იბრძვიან, ხოლო ნატოს შემაკავებელი ძალა პირდაპირ თავდასხმას უკიდურესად ნაკლებად სავარაუდოს ხდის.

• ფინეთის პრეზიდენტმა ასევე გამოთქვა მოსაზრება, რომ ევროპა უახლოვდება მომენტს, როდესაც მას მოსკოვთან პირდაპირი პოლიტიკური დიალოგის განახლება დასჭირდება.
• "დარწმუნებული ვარ, ვუახლოვდებით იმ დღეს, როდესაც ევროპელებისთვის სასარგებლო იქნება რუსეთთან უფრო პირდაპირი კონტაქტის დამყარება, განსაკუთრებით იმიტომ, რომ თავიდან ავიცილოთ გაუგებრობები," - თქვა მან.
• სტუბმა ხაზი გაუსვა, რომ "ევროპა ჯერ არ მისულა აქამდე" და აღნიშნა, რომ მთავარ პრიორიტეტად უკრაინის მხარდაჭერა რჩება. გარდა ამისა, ფინეთის პრეზიდენტმაგამოთქვა ეჭვი რუსეთის შესაძლებლობაზე, თავს დაესხას "მსოფლიოში ყველაზე ძლიერ სამხედრო ალიანსს - ნატოს."