19:26 | 06 ოქტომბერი, 2026 — რუსეთი
ФСБ-ს მაღალჩინოსნები პირად საქმეზეც პრივილეგირებული კლასით იფრენენ
ფედერალური უსაფრთხოების სამსახურმა (ФСБ) თავისი ხელმძღვანელობისთვის ფრენების დროს კომფორტის დონის ამაღლება გადაწყვიტა.
შესაბამისი ბრძანება სამართლებრივი აქტების პროექტების პორტალზე გამოქვეყნდა.
ვითარების არსი: ფსბ-ს პროექტი ითვალისწინებს უარის თქმას მოქმედ დაყოფაზე, რომლის მიხედვითაც ცალკე რეგულირდება მივლინებები, ახალ სამსახურის ადგილზე გადასვლა და ცალკე - ძირითად და სარეაბილიტაციო შვებულებაში, მკურნალობაზე და „სხვა მიზნებით“ მგზავრობა.
- ამჟამად, მივლინებებში ფსბ-ს კოლეგიის წევრებს თვითმფრინავის პირველი კლასი ეკუთვნით, დანარჩენ უმაღლეს ოფიცრებს - ბიზნესკლასი, ხოლო პოლკოვნიკის ან პირველი რანგის კაპიტნის წოდების მქონე ხელმძღვანელ თანამშრომლებს - ეკონომკლასი.
- შვებულებაში, მკურნალობაზე და სხვა შემთხვევებში მგზავრობისთვის მოქმედი ბრძანება უფრო დაბალ კატეგორიებს ადგენს: ფსბ-ს კოლეგიის წევრებს და უმაღლეს ოფიცრებს შეუძლიათ ბიზნესკლასით იფრინონ, ხოლო დანარჩენებს ეკონომკლასი ეკუთვნით.
- ახალი დადგენილებით კოლეგიის წევრები პირველი კლასით იმგზავრებენ, უმაღლეს ოფიცრებს და იმ სამხედრო მოსამსახურეებს, რომლებიც უმაღლესი ოფიცრების თანამდებობებს იკავებენ - ბიზნესკლასით.
- ხელმძღვანელებს სამმართველოს უფროსის მოადგილიდან და ზემოთ, თუ თანამდებობისთვის პოლკოვნიკის ან პირველი რანგის კაპიტნის წოდებაა გათვალისწინებული, - "კომფორტ" კლასი. დანარჩენი კონტრაქტორები ეკონომკლასით იფრენენ.
- პროექტის თანახმად, მგზავრობის იგივე კატეგორიები გავრცელდება იმ კონტრაქტორების ოჯახის წევრებზეც, რომლებსაც უფლება აქვთ ისარგებლონ უფასო მგზავრობით.
- დოკუმენტში ასევე აღნიშნულია, რომ დაღუპული სამხედრო მოსამსახურეების ოჯახები შეინარჩუნებენ იმ კატეგორიას, რომელიც სამხედრო მოსამსახურეს მისი გარდაცვალების დღისთვის ეკუთვნოდა.
- გარდა ამისა, პროექტის თანახმად უწყების თანამშრომლები რეისის გაუქმების ან გადადების შემთხვევაში მსხვილ კომპენსაციებს მიიღებენ.
ჩაშლილად: პროექტი ითვალისწინებს, რომ იარაღით, საბრძოლო მასალით, სპეცტექნიკით, დოკუმენტებით ან სამხედრო ქონებით სამსახურებრივი მგზავრობისას ფსბ-ს შეეძლება გადაიხადოს ცალკე კუპე ან კაიუტა, ხოლო საჰაერო მგზავრობისას - დამატებითი ადგილები, მათ შორის თვითმფრინავის საბარგულში.
- დოკუმენტის თანახმად, დამატებითი ადგილების გადახდა სამედიცინო ჩვენებებითაც იქნება შესაძლებელი.
- მოქმედი კანონის თანახმად, რუსეთის მასშტაბით სახელმწიფოს ხარჯზე გადაადგილება შეუძლიათ მათ, ვინც მსახურობს შორეულ ჩრდილოეთში და მასთან გათანაბრებულ ტერიტორიებზე, ურალის, ციმბირისა და შორეული აღმოსავლეთის ფედერალურ მხარეებში, ასევე საზღვარგარეთ.
წინარე ისტორია: როგორც გამოცემა "პროექტის" ბოლო გამოძიებამ დაადგინა, მაღალი რანგის რუსი ძალოვნები კომერციული რეისებით სარგებლობის ნაცვლად, ხშირ შემთხვევაში კერძო თვითმფრინავებს იყენებენ.
დაკავშირებული თეგები
