ახალი ამბები

გაერთიანებული სამეფოს მიერ მართული პროგრამების ფარგლებში ქვეყანაში მომზადება 68 000-ზე მეტმა უკრაინელმა სამხედრომ გაიარა.

ინფორმაციას ამის შესახებ გამოცემა UK Defence Journal-ი თავდაცვის მინისტრზე დაყრდნობით ავრცელებს.

რატომ არის მნიშვნელოვანი: ეს არის ერთ-ერთი ყველაზე მასშტაბური მრავალეროვნული სასწავლო მისია, რომელიც ოდესმე ჩატარებულა სამეფოს ტერიტორიაზე.

• გადამზადების კურსები მუდმივად ადაპტირდება ფრონტის ხაზიდან მიღებული გამოცდილების შესაბამისად, რაც განსაკუთრებულ აქცენტს აკეთებს დრონების საფრთხეებზე, რადიოელექტრონულ ბრძოლასა და საარტილერიო ომის რეალიებზე.

დეტალურად: წვრთნები 2022 წლის ზაფხულში დაიწყო. კურსი სამხედრო გამოცდილების არმქონე უკრაინელ ახალწვეულებს საბრძოლო მომზადების საბაზისო უნარებს - იარაღის გამოყენებას, პირველად სამედიცინო დახმარებას, სანგრებისა და ურბანულ ბრძოლებს ასწავლის.

• ბრიტანელ ინსტრუქტორებთან ერთად პროგრამაში ათზე მეტი პარტნიორი ქვეყნის პერსონალი მონაწილეობს.

• საბაზისო მომზადების გარდა, პროგრამა მოიცავს უმცროსი მეთაურების, მედიკოსებისა და საზღვაო ქვეითების მომზადებას.

• ბრიტანეთი ცალკე წვრთნის უკრაინელ პილოტებსაც დასავლურ გამანადგურებლებზე გადასაყვანად.

კონტექსტი: სწავლება Interflex-ი დაეფუძნა ოპერაცია Orbital-ს - წვრთნების მისიას, რომელიც 2015 წლიდან სრულმასშტაბიან შემოჭრამდე უშუალოდ უკრაინის ტერიტორიაზე მიმდინარეობდა და რომლის ფარგლებშიც 22,000-ზე მეტი უკრაინელი სამხედრო გადამზადდა.