ახალი ამბები

საფრანგეთის პრეზიდენტი ემანუელ მაკრონი 23 ოქტომბერს, ახალი საპროტესტო აქციების წინ, მოსწავლეთა წარმომადგენლებსა და სამართალდამცავი ორგანოების თანამშრომლებს შეხვდება. ამ ინფორმაციას France 24 ავრცელებს.

ვითარების არსი: საფრანგეთის პრეზიდენტის შეხვედრა უფროსკლასელთა მოძრაობის წარმომადგენლებთან პირველია სტუდენტური პროტესტის დაწყებიდან, რომელიც უკვე ერთ თვეზე მეტია გრძელდება.

• პრეზიდენტი ასევე ჩაატარებს თავდაცვის საბჭოს ახალ სხდომას, რათა მოემზადოს შაბათისთვის დაგეგმილი დემონსტრაციებისთვის.
• იმავდროულად, საფრანგეთის პრემიერ-მინისტრი სებასტიენ ლეკორნუ პარასკევს ლიმოჟს ეწვევა - ქალაქს, რომელიც განსაკუთრებით დაზარალდა 17 ოქტომბერს, რადგან იქ მომიტინგეებმა მუნიციპალიტეტის მერიის შენობა დაწვეს და ამჟამად ქალაქში ხანძრის გარემოებების გამოძიება მიმდინარეობს.

სტრიქონებს შორის: საფრანგეთში უკვე ერთ თვეზე მეტია მასობრივი პროტესტი გრძელდება, რომელიც უფროსკლასელების დემონსტრაციებით დაიწყპ, რომლებიც ცუდ სასწავლო პირობებს აპროტესტებდნენ.

• მოგვიანებით პროტესტს სხვადასხვა პროფესიის წარმომადგენლებიც შეუერთდნენ, რომლებიც ფასების ზრდას და დაბალ ხელფასებს აპროტესტებენ.
• 17 ოქტომბრის ყველაზე მასშტაბური პროტესტის დროს მთელ ქვეყნაში ძალადობისა და ძარცვის მრავალი ფაქტი დაფიქსირდა.
• 24 ოქტომბრისთვის, მოსახლეობის "ეროვნული მობილიზაციის" მეორე ტალღაა დაგეგმილი. ზოგიერთ ქალაქში, მათ შორის მარსელში, პროტესტი აიკრძალა და საზოგადოებრივი ტრანსპორტის მუშაობა ერთი დღით შეჩერდება.

დიდი სურათი: საფრანგეთის საპრეზიდენტო არჩევნებში ულტრამემარჯვენე კანდიდატის, მარინ ლე პენის მხარდაჭერა საპროტესტო აქციების ფონზე გაიზარდა. Ifop-Fiducial-ის კვლევის თანახმად, სხვადასხვა სცენარში მარინ ლე პენი პირველ ტურში ხმათა 34-38%-ს აგროვებს და მეორე ადგილზე მყოფ კანდიდატს 18-22%-ით უსწრებს.

• ულტრამემარცხენე კანდიდატი ჟან-ლუკ მელანშონი მეორე ადგილს იკავებს, თუმცა მეორე, მესამე და მეოთხე ადგილზე მყოფ კანდიდატებს შორის სხვაობა ძალიან მცირეა.
• მეორე ტურში მარინ ლე პენი ყველა შესაძლო კონკურენტს ამარცხებს. მისთვის ყველაზე რთული მეტოქე ედუარ ფილიპი იქნება, რომელთანაც 56%-ით გაიმარჯვებდა 44%-ის წინააღმდეგ.