ახალი ამბები

აშშ-ის თავდაცვის მდივან პიტ ჰეგსეთს იმპიჩმენტი ემუქრება. 3 ნოემბრის შუალედურ არჩევნებში რესპუბლიკელების მძიმე მარცხის შემდეგ, პარტიის ნაწილმა პასუხისმგებლობის დაკისრება სწორედ მასზე დაიწყო.

ინფორმაციას ამის შესახებ ტელევიზია CNN ავრცელებს.

ვითარების არსი: CNN-ის ცნობით, რესპუბლიკელი კონგრესმენი თომას მასი მომავალ კვირას, კონგრესის მუშაობის განახლებისთანავე, ჰეგსეთის იმპიჩმენტის საკითხზე კენჭისყრის გამართვას გეგმავს.

• CNN-ის რამდენიმე რესპუბლიკური წყარო ვარაუდობს, რომ ინიციატივა წარმომადგენელთა პალატაში მხარდაჭერას მოიპოვებს.

• დემოკრატებიც გეგმავენ ირანთან ომის შესახებ მასშტაბურ გამოძიებას, რომლის ერთ-ერთი მთავარი სამიზნე ჰეგსეთი იქნება.

რატომ ჰეგსეთი?: რესპუბლიკელების ნაწილი მიიჩნევს, რომ თავდაცვის მდივანმა გადამწყვეტი როლი ითამაშა დონალდ ტრამპის დარწმუნებაში, ირანის წინააღმდეგ ომი დაეწყო.

მათი ბრალდებით, ჰეგსეთმა:

• გადაჭარბებულად შეაფასა ირანზე სწრაფი და მარტივი გამარჯვების შესაძლებლობა;

• ომის დასრულების მკაფიო სტრატეგიის გარეშე დაუჭირა მხარი სამხედრო მოქმედებებს;

• ომის გაჭიანურების მიუხედავად, სამხედრო ესკალაციის გაგრძელებას მოითხოვდა.

CNN-ის მიხედვით, რესპუბლიკელების ნაწილი ამტკიცებს, რომ ირანთან ომმა გაამწვავა ეკონომიკური პრობლემები და მნიშვნელოვნად შეუწყო ხელი არჩევნებში პარტიის დამარცხებას. ამასთან, ბევრი მათგანი უშუალოდ ტრამპის დადანაშაულებას ერიდება.

სტრიქონებს შორის: Axios-ის ცნობით, ჰეგსეთის პოზიციები ტრამპის ადმინისტრაციაშიც შესუსტებულია. გამოცემის წყაროების თანახმად, რესპუბლიკელების მძიმე საარჩევნო მარცხის შემდეგ თეთრ სახლში განიხილავენ, ვინ უნდა აიღოს პოლიტიკური პასუხისმგებლობა, ერთ-ერთ მთავარ კანდიდატად კი სწორედ თავდაცვის მდივანი მიიჩნევა.

• თუ ტრამპი ჰეგსეთის გათავისუფლებას გადაწყვეტს, შესაძლოა ეს 2027 წლის 3 იანვრამდე გააკეთოს, სანამ სენატში უმრავლესობას რესპუბლიკელები ინარჩუნებენ.

• ამის შემდეგ ახალი თავდაცვის მდივნის დამტკიცება შესაძლოა მნიშვნელოვნად გართულდეს.

• Axios ასევე წერს, რომ ჰეგსეთს შესაძლოა ტენესის შტატიდან სენატორის თანამდებობის დაკავების შესაძლებლობა გაუჩნდეს. ტრამპმა ეს იდეა დადებითად შეაფასა, თუმცა განაცხადა, რომ ასეთი გეგმის შესახებ არაფერი სმენია.

რას ამბობს ტრამპი?: პრეზიდენტი საჯაროდ კვლავ იცავს ჰეგსეთს და აცხადებს, რომ ის თავის საქმეს კარგად ასრულებს.

• 4 ნოემბერს ტრამპმა თქვა, რომ მისი თანამდებობიდან გათავისუფლებას არ გეგმავს.
• თავად ჰეგსეთიც გადადგომას არ აპირებს და იმპიჩმენტის მცდელობისთვის წინააღმდეგობის გასაწევად მზადაა.
• პენტაგონი მის წინააღმდეგ გამოთქმულ ბრალდებებს უარყოფს.

კონტექსტი: 3 ნოემბრის არჩევნების შედეგად დემოკრატებმა კონგრესის ორივე პალატაზე კონტროლი მოიპოვეს.

• იანვრიდან მათ შესაძლებლობა ექნებათ, ტრამპის ადმინისტრაციის საქმიანობის საპარლამენტო გამოძიებები წამოიწყონ.
• თუმცა მნიშვნელოვანია განსხვავება: წარმომადგენელთა პალატაში იმპიჩმენტის მხარდაჭერა ჰეგსეთის ავტომატურ გათავისუფლებას არ ნიშნავს. თანამდებობიდან მის ჩამოშორებას სენატში ხმების ორი მესამედი დასჭირდება.