ახალი ამბები

NATO უკრაინას საშუალებას მისცემს, ალიანსის ცენტრალიზებული შესყიდვების სააგენტოს მეშვეობით შეიძინოს იარაღი, საბრძოლო მასალა და სამხედრო აღჭურვილობა.

ახალი მექანიზმი კიევს შეიარაღების უფრო სწრაფად და დაბალ ფასად მიღების შესაძლებლობას მისცემს.

ინფორმაციას Financial Times ავრცელებს.

ვითარების არსი: უკრაინა NATO-ს მხარდაჭერისა და შესყიდვების სააგენტოსთან (NSPA) პარტნიორობას იწყებს. შედეგად, ქვეყანას შეიარაღების შესყიდვის დამატებითი გზა გაუჩნდება და აღარ მოუწევს მხოლოდ ცალკეულ სახელმწიფოებთან ორმხრივ მოლაპარაკებებზე დაყრდნობა.

• უკრაინას შეეძლება, საჭირო სამხედრო პროდუქციის შესყიდვა უშუალოდ NSPA-ს დაუკვეთოს.

• სააგენტო შესყიდვებს საკუთარი გამოცდილების, მომწოდებლების ქსელისა და არსებული კონტრაქტების გამოყენებით განახორციელებს.

• ცენტრალიზებული შესყიდვები და დიდი მოცულობის შეკვეთები პროდუქციის ღირებულების შემცირებასა და მიწოდების დაჩქარებას შეუწყობს ხელს.

მუშაობის მექანიზმი: NSPA-ს წარმომადგენლის, ჟაკლინ ბორსბომის განმარტებით, უკრაინას შეეძლება სააგენტოს მიმართოს მოთხოვნით: "გვჭირდება 30,000 სამხედრო ფორმა და გვინდა, რომ ისინი ჩვენთვის შეიძინოთ".

• მისი თქმით, მექანიზმი უკრაინას NATO-ს შესყიდვების გამოცდილებასა და თავდაცვის ინდუსტრიის არსებულ შესაძლებლობებზე წვდომას მისცემს.

რატომ არის მნიშვნელოვანი: ახალი შეთანხმება მხოლოდ უკრაინის მიერ შეიარაღების შეძენას არ ეხება, ის უკრაინულ სამხედრო კომპანიებს NATO-ს თავდაცვის ინდუსტრიასთანაც აახლოებს.

• აპრილში ალიანსმა უკრაინულ კომპანიებს NSPA-ს ტენდერებში მონაწილეობის უფლება მისცა.

• გასულ კვირას კიევში სააგენტომ დაახლოებით 150 უკრაინული კომპანიის მონაწილეობით შეხვედრა გამართა და მათ NATO-ს მომწოდებლებად რეგისტრაციისა და კონტრაქტებისთვის კონკურენციის წესები გააცნო.

• შედეგად, უკრაინულ კომპანიებს შესაძლებლობა ექნებათ, NATO-ს შესყიდვებში მომწოდებლებადაც ჩაერთონ.

დიდი სურათი: ახალი მექანიზმით უკრაინა NATO-ს თავდაცვის ინდუსტრიაში ორმხრივად ერთვება - შეძლებს ალიანსის მეშვეობით შეიარაღების შეძენას, ხოლო უკრაინული კომპანიები NATO-ს კონტრაქტებისთვის იბრძოლებენ.

კონტექსტი: შეთანხმება უკრაინასა და აშშ-ს შორის ურთიერთობების გაუარესების ფონზე ფორმდება.

• დონალდ ტრამპი კიევს რუსეთის ნავთობგადამამუშავებელ ქარხნებზე დარტყმების გამო აკრიტიკებს, ხოლო ვაშინგტონი მოსკოვთან სამშვიდობო მოლაპარაკებების განახლებას ცდილობს.
• პარალელურად, ევროპული ქვეყნები თავდაცვით ხარჯებს ზრდიან და უკრაინულ სამხედრო ტექნოლოგიებს, განსაკუთრებით საბრძოლო დრონებს, სულ უფრო მეტ ყურადღებას უთმობენ.