ახალი ამბები

უკრაინის შეიარაღებული ძალებისთვის სატელიტური კავშირის სისტემის, Starshield-ის, მუშაობის შეზღუდვის ბრძანება უშუალოდ თეთრი სახლიდან გაიცა.

ინფორმაციას ამის შესახებ Reuters ავრცელებს.

ვითარების არსი: სააგენტოს წყაროების ცნობით, აშშ-ის თავდაცვის დეპარტამენტის ხელმძღვანელობამ მიიღო მითითება, რომლის თანახმადაც უკრაინის არმიისთვის SpaceX-ის სატელიტური სისტემის, Starshield-ის, მუშაობა უნდა შეზღუდულიყო.

• წყაროს სააგენტოსთვის არ დაუკონკრეტებიათ, ვინ მიიღო გადაწყვეტილება თეთრ სახლში ან ვის დაევალა მისი შესრულება.

• Starshield ილონ მასკის კომპანიის, SpaceX-ის, მიერ შექმნილი სატელიტური კავშირის სამხედრო სისტემაა, რომლის უმსხვილესი მომხმარებელი პენტაგონია.

• უკრაინა სისტემას ფრონტზე კომუნიკაციისთვის, დამრტყმელი და გადამჭერი დრონების მართვისთვის იყენებს.

დაეწიე ამბავს: 14 ოქტომბერს უკრაინელმა სამხედროებმა განაცხადეს, რომ Starshield-ის ტერმინალებმა მაღალი სიჩქარით მოძრაობისას კავშირის დაკარგვა დაიწყეს, რამაც რამდენიმე სამხედრო ოპერაცია შეაფერხა.

• ტერმინალების მუშაობა 160 კმ/სთ-ზე მაღალი სიჩქარით გადაადგილებისას იზღუდებოდა, რის გამოც უკრაინულ დრონებს მართვისა და კავშირის პრობლემები შეექმნათ.

• შეფერხებებმა გავლენა იქონია რუსეთის სამხედრო პოზიციებსა და მომარაგების ხაზებზე დარტყმებზე, ასევე რუსული "შაჰედების" წინააღმდეგ გადამჭერი დრონების გამოყენებაზე.

• უკრაინის თავდაცვის სამინისტროს წარმომადგენლის ცნობით, ხუთშაბათისთვის მოძრაობისას ტერმინალების მუშაობა აღდგა, თუმცა მხოლოდ 160 კმ/სთ-მდე სიჩქარეზე.

რას ამბობს ვაშინგტონი: Reuters-ის კითხვაზე პასუხად აშშ-ის ერთ-ერთმა მაღალჩინოსანმა უარყო, რომ Starshield-ის შეზღუდვა პირადად დონალდ ტრამპმა მოითხოვა.

• "პრეზიდენტს მსგავსი მოთხოვნა არასდროს გაუცია", - განაცხადა მან.
• თეთრ სახლს არ უპასუხია კითხვაზე, შეიძლებოდა თუ არა მითითება ადმინისტრაციის სხვა წარმომადგენლისგან წამოსულიყო.
• ამასთან, ილონ მასკის განცხადებით, Starshield-ის სისტემებს აშშ-ის მთავრობა ფლობს და აკონტროლებს, შესაბამისად, მათი გამოყენებისა და შეზღუდვების შესახებ გადაწყვეტილებებს ამერიკის სამხედრო ხელმძღვანელობა ან პრეზიდენტი იღებს.

რატომ არის მნიშვნელოვანი: შეზღუდვები კიევსა და ვაშინგტონს შორის ურთიერთობების გამწვავების ფონზე ამოქმედდა.

• დონალდ ტრამპი უკრაინისგან რუსეთის ნავთობგადამამუშავებელ ქარხნებზე დრონებით დარტყმების შეწყვეტას მოითხოვს და კიევს მსოფლიო ბაზარზე დიზელის საწვავის გაძვირებაში ადანაშაულებს.

• ანალიტიკოსების შეფასებით, საწვავის ფასების მკვეთრი ზრდა ძირითადად აშშ-ისა და ისრაელის ირანთან ომით არის გამოწვეული.

• პარალელურად, ვაშინგტონმა მოსკოვთან დიზელის მიწოდების შეთანხმებას მიაღწია, რომლის თანახმადაც რუსეთმა ამერიკულ და გლობალურ ბაზრებზე 2,25 მილიონ ბარელზე მეტი საწვავი უნდა გაიტანოს.

დიდი სურათი: Reuters-ის ახალი ინფორმაცია ცხადყოფს, რომ Starshield-ის შეზღუდვის მითითება თეთრი სახლიდან მოდიოდა, თუმცა ჯერ კიდევ უცნობია, კონკრეტულად ვინ მიიღო გადაწყვეტილება.

• სატელიტური კავშირის მოულოდნელმა შეზღუდვამ და რუსული სარაკეტო იერიშებზე სადაზვერვო გაფრთხილებების პრობლემამ უკრაინაში ამერიკული სამხედრო მხარდაჭერის საიმედოობასთან დაკავშირებით შეშფოთება გააძლიერა.

კონტექსტი: Starshield-ის შეზღუდვების პარალელურად, უკრაინის პრეზიდენტმა ვოლოდიმირ ზელენსკიმ განაცხადა, რომ ქვეყანამ რუსეთის მასშტაბური სარაკეტო თავდასხმების შესახებ პარტნიორებისგან [იგულისხმება აშშ რედ.] წინასწარი სადაზვერვო გაფრთხილება ზედიზედ ორჯერ ვერ მიიღო.

• ზელენსკის თქმით, უკრაინულმა სისტემებმა რუსული ბალისტიკური რაკეტები მხოლოდ მაშინ აღმოაჩინეს, როდესაც ისინი პრაქტიკულად უკვე კიევს უახლოვდებოდნენ.

• ტრამპმა უარყო, რომ აშშ-მა უკრაინისთვის სადაზვერვო ინფორმაციის გაზიარება შეწყვიტა და განაცხადა, რომ ვაშინგტონი კიევის დახმარებას აგრძელებს.