ახალი ამბები

აშშ-ის სამხედრო გამოძიება ვარაუდობს, რომ 28 თებერვალს, ირანის გოგონათა სკოლაზე თავდასხმაში, რომელსაც ათობით ბავშვი ემსხვერპლა, პასუხისმგებლობა, სავარაუდოდ, აშშ-ის ძალებს ეკისრებათ, თუმცა გამოძიება ჯერ არ დასრულებულა - იუწყება სააგენტო Reuters-ი აშშ-ის ორ ოფიციალურ პირზე დაყრდნობით.

ვითარების არსი: ირანის ქალაქ მინაბში მდებარე გოგონათა სკოლა შაბათს, აშშ-ისა და ისრაელის მიერ ირანზე დარტყმების პირველ დღეს დაიბომბა. ჟენევაში გაერო-სთან ირანის ელჩმა, ალი ბაჰრეინიმ განაცხადა, რომ თავდასხმას 150 მოსწავლე ემსხვერპლა. Reuters-მა აღნიშნული მონაცემების დამოუკიდებლად დადასტურება ვერ შეძლო.

• აშშ-ის ომის მდივანმა, პიტ ჰეგსეტმა ოთხშაბათს დაადასტურა, რომ სამხედრო უწყება ინციდენტს იძიებს.

• წყაროებმა, რომლებმაც ანონიმურობის პირობით ისაუბრეს, არ გამორიცხეს შესაძლო ახალი მტკიცებულებების გამოჩენა, რომლებიც აშშ-ს პასუხისმგებლობისგან გაათავისუფლებს და ინციდენტში სხვა დამნაშავე მხარეზე მიუთითებს.

დეტალები: სააგენტომ ვერ მოახერხა გამოძიების შესახებ დეტალების დადგენა, მათ შორის იმის, თუ რა მტკიცებულებებმა განაპირობა ეს წინასწარი შეფასება, რა ტიპის საბრძოლო მასალა იქნა გამოყენებული, ან რატომ შეიძლება დაერტყა აშშ-ს სკოლისთვის.

• პენტაგონმა Reuters-ის კითხვები ცენტრალურ სარდლობას გადაამისამართა, რომლის სპიკერმა, კაპიტანმა ტიმოთი ჰოკინსმა განაცხადა: „ინციდენტი გამოძიების პროცესშია და კომენტარის გაკეთება უადგილო იქნება“.

კომენტარები: თეთრმა სახლმა გამოძიებაზე პირდაპირი კომენტარი არ გააკეთა, თუმცა პრესმდივანმა კაროლინ ლევიტმა განაცხადა: „მიუხედავად იმისა, რომ ომის დეპარტამენტი ამ საკითხს იძიებს, ირანის რეჟიმი მიზანმიმართულად ესხმის თავს მშვიდობიან მოსახლეობასა და ბავშვებს და არა ამერიკის შეერთებული შტატები“.

• ოთხშაბათს გამართულ ბრიფინგზე პიტ ჰეგსეტმა აღნიშნა: „ჩვენ ამას ვიძიებთ. რა თქმა უნდა, ჩვენ არასდროს ვესხმით თავს სამოქალაქო ობიექტებს“.

• აშშ-ის სახელმწიფო მდივანმა მარკო რუბიომ კი ორშაბათს ჟურნალისტებს უთხრა, რომ აშშ სკოლას განზრახ არ დაარტყამდა.

ტაქტიკა: ისრაელი და აშშ-ის ძალები ამ დრომდე თავიანთ დარტყმებს ირანში გეოგრაფიულად და სამიზნის ტიპის მიხედვით ინაწილებდნენ. სანამ ისრაელი დასავლეთ ირანში რაკეტების გამშვებ პუნქტებს ურტყამდა, აშშ სამხრეთში ნავთობის ინფრასტრუქტურასა და საზღვაო სამიზნეებს ესხმოდა თავს.

გამოხმაურება: გაეროს ადამიანის უფლებათა ოფისმა სამშაბათს ინციდენტის გამოძიება მოითხოვა. ოფისის სპიკერმა ჟენევაში გამართულ ბრიფინგზე განაცხადა, რომ პასუხისმგებლობა ფაქტის გამოძიებაზე თავდამსხმელ მხარეს ეკისრება.

• ირანის სახელმწიფო ტელევიზიით სამშაბათს გოგონების დაკრძალვის კადრები აჩვენეს. მათი პატარა კუბოები, რომლებიც ირანის დროშებით იყო დაფარული, სატვირთო მანქანიდან მრავალრიცხოვანმა ხალხმა საფლავისკენ გადაიტანა.

სამართლებრივი ასპექტი: საერთაშორისო ჰუმანიტარული სამართლის თანახმად, სკოლაზე, საავადმყოფოზე ან ნებისმიერ სხვა სამოქალაქო ნაგებობაზე მიზანმიმართული თავდასხმა, დიდი ალბათობით, სამხედრო დანაშაულად ჩაითვლება.

• თუ აშშ-ის მონაწილეობა დადასტურდა, ეს დარტყმა ახლო აღმოსავლეთში აშშ-ის კონფლიქტების ათწლეულების განმავლობაში მშვიდობიანი მოსახლეობის დაღუპვის ერთ-ერთ ყველაზე მძიმე შემთხვევად შეფასდება.