ახალი ამბები

უკრაინა მხარს უჭერს პოლონეთის იდეას გერმანული საზენიტო-სარაკეტო სისტემების, Patriot-ების უკრაინაში განლაგების შესახებ.

ამის შესახებ 1 დეკემბერს Polsat News-თან ინტერვიუში უკრაინის საგარეო საქმეთა მინისტრმა დმიტრო კულებამ განაცხადა.

მისი თქმით, ეს არის "საუკეთესო გზა არა მხოლოდ უკრაინის, არამედ პოლონეთის, ევროპისა და ნატოს სხვა ქვეყნების დასაცავად".

კულებამ აღნიშნა, რომ უკრაინამ უკვე "დაიწყო მოლაპარაკებები" გერმანიასთან. გარდა ამისა, ეს საკითხები დაისვა შეერთებულ შტატებთან, რადგან ისინი ფლობენ Patriot-ის ტექნოლოგიებს.

კულებამ თქვა, რომ ის იყენებს ნატოსა და ეუთოს მინისტრთა შეხვედრებს, რათა "კომუნიკაცია ჰქონდეს ყველასთან, ვისაც შეუძლია მიიღოს გადაწყვეტილება Patriot-ების უკრაინისთვის მიწოდებასთან დაკავშირებით".

კონტექსტი

პოლონეთის ტერიტორიაზე უცნობი რაკეტის ჩამოვარდნის შემდეგ, გერმანიის თავდაცვის სამინისტრომ ვარშავას Patriot-ის სარაკეტო თავდაცვის სისტემის პოლონეთის საჰაერო სივრცის დასაცავად გამოყენება შესთავაზა.

23 ნოემბერს პოლონეთის მმართველი პარტიის, "კანონი და სამართლიანობის" ლიდერმა იაროსლავ კაჩინსკიმ თქვა, რომ რაკეტსაწინააღმდეგო თავდაცვის სისტემა, რომელიც გერმანიამ პოლონეთს შესთავაზა, უფრო ეფექტური იქნება მეომარ უკრაინაში. კაჩინსკის წინადადებას პოლონეთის თავდაცვის სამინისტრომ მხარი დაუჭირა.

საპასუხოდ, გერმანიის თავდაცვის სამინისტრომ განაცხადა, რომ ნატოს ინტეგრირებული საჰაერო თავდაცვის ნაწილის ბლოკის გარეთ გატანისთვის, წინასწარი მოლაპარაკებებია საჭირო ნატოსთან და მოკავშირეებთან.

ნატოს გენერალურმა მდივანმა იენს სტოლტენბერგმა აღნიშნა, რომ გადაწყვეტილება უკრაინისთვის Patriot-ის საჰაერო თავდაცვის სისტემების გადაცემის შესახებ ცალკეულმა ქვეყნებმა უნდა მიიღონ და არა ნატომ.

CNN-ის ცნობით, პენტაგონი განიხილავს უკრაინისთვის Patriot-ის საჰაერო თავდაცვის სისტემების მიწოდების შესაძლებლობას, მაგრამ არა ახლა.