დამასკოსთან ისრაელმა ირანული უპილოტო საფრენი აპარატების საწარმო დაბომბა

სირიის დედაქალაქ დამასკოს მახლობლად მდებარე ობიექტებზე ისრაელის საჰაერო ძალების დარტყმის შედეგად, ირანული უპილოტო საფრენი აპარატების საწარმო განადგურდა. ამის შესახებ 22 ივლისს სირიის ადამიანის უფლებათა მონიტორინგის ცენტრმა (SOHR) განაცხადა.

უფლებადამცველებმა აღნიშნეს, რომ ისრაელის არმია თავს დაესხა სამხედრო ობიექტებს დამასკოს მიდამოებში და ერთ-ერთ რაიონში უპილოტო საფრენი აპარატები მზადდებოდა.

SOHR-ის წყაროები ირწმუნებიან, რომ თავდასხმას "არასირიელი ეროვნების" სამი ადამიანი და ლიბანურ ჰეზბოლას ჯგუფთან დაკავშირებული ორი პერსონა შეეწირა.

ისრაელმა, უფლებადამცველების თქმით, მთლიანად გაანადგურა საწყობი საიდ-ზეინაბის რაიონში, რომლის სიახლოვეს ირანული დრონების საწარმო იყო განთავსებული.

12 ივლისს, შეერთებული შტატების პრეზიდენტის თანაშემწემ ეროვნული უსაფრთხოების საკითხებში ჯეიკ სალივანმა განაცხადა, რომ ირანი აპირებს რუსეთს რამდენიმე ასეულამდე უპილოტო საფრენი აპარატი გადასცეს.

ირანმა განაცხადა, რომ თეირანი თავს არიდებს ნებისმიერ ქმედებას, რამაც შეიძლება გამოიწვიოს უკრაინაში სიტუაციის შემდგომი ესკალაცია, მათ შორის სამხედრო ტექნიკის მიწოდება.

19 ივლისს რუსეთის პრეზიდენტი ვლადიმირ პუტინი თეირანში იმყოფებოდა, სადაც ირანის უზენაეს ლიდერს და სულიერ ლიდერს, აიათოლა ალი ხამენეის შეხვდა.

მსგავსი სიახლეები