ახალი ამბები

აშშ-მა უკრაინისთვის სადაზვერვო ინფორმაციის გაზიარება განაახლა, რომელიც კიევსა და დონალდ ტრამპის ადმინისტრაციას შორის ურთიერთობების გამწვავების ფონზე დროებით შეწყვეტილი იყო.

ვითარების არსი: ზელენსკის თქმით, ვაშინგტონმა უკრაინისთვის სადაზვერვო ინფორმაციის მიწოდებაზე დაწესებული შეზღუდვები მოხსნა.

• მანამდე უკრაინის პრეზიდენტი აცხადებდა, რომ აშშ რუსული რაკეტების გაშვების შესახებ ინფორმაციას დროულად აღარ აწვდიდა.

• "ამისთვის ძალიან მადლობელი ვართ. ახლა ყველაფერი მუშაობს", - განაცხადა ზელენსკიმ.

რა ხდება Starlink-ის შემთხვევაში: ზელენსკის განცხადებით, აშშ კვლავ ზღუდავს მაღალი სიჩქარით მოძრავ უკრაინულ დრონებზე დამონტაჟებული Starlink-ის ტერმინალების მუშაობას.

• უკრაინის პრეზიდენტმა აღნიშნა, რომ არ იცის, კონკრეტულად ვინ მიიღო შეზღუდვის გადაწყვეტილება, თუმცა ვარაუდობს, რომ მასში მონაწილეობდნენ როგორც დონალდ ტრამპი, ისე ილონ მასკი.

• მისი თქმით, თუ ტრამპი შესაბამის გადაწყვეტილებას მიიღებს, სისტემა დაუყოვნებლივ დაუბრუნდება მუშაობის ძველ რეჟიმს.

დიპლომატიური კონტექსტი: ზელენსკი კვირას აშშ-ის პრეზიდენტის სპეციალურ წარმომადგენლებს ესაუბრა და იმედოვნებს, რომ უახლოეს დღეებში უკრაინისა და აშშ-ის დელეგაციების პირისპირ შეხვედრაც გაიმართება.

• სატელეფონო საუბარში ზელენსკიმ, ვიტკოფმა და კუშნერმა განიხილეს ორ ქვეყანას შორის არსებული დაძაბულობა და სამშვიდობო მოლაპარაკებების აღდეგნის საკითხი.
• NBC-მ ზელენსკის ტრამპის კრიტიკაზეც ჰკითხა, მათ შორის განცხადებაზე, რომ აშშ-ის პრეზიდენტისთვის ვლადიმირ პუტინთან ურთიერთობა უფრო მარტივია, ვიდრე უკრაინის ლიდერთან.
• ზელენსკის თქმით, ტრამპთან ყოველთვის გულწრფელია - "შესაძლოა, ეს არც ისე თავაზიანია, მაგრამ უმჯობესია გყავდეს პარტნიორები, რომლებიც ღიად და მკაფიოდ საუბრობენ, ვიდრე საქმე გქონდეს მკვლელებთან, თუნდაც ისინი გაღიმებული გესაუბრებოდნენ", - განაცხადა უკრაინის პრეზიდენტმა.