ახალი ამბები

აშშ ორ ბელარუსულ საწარმოს - კომპანია "ლაკოკრასკასა" და კონცერნ "ბელლესბუმპრომს" სანქციებს მოუხსნის.

ამის შესახებ მინსკში გამართული მოლაპარაკებების შედეგად დონალდ ტრამპის სპეციალურმა წარმომადგენელმა ბელარუსის საკითხებში, ჯონ კოულმა განაცხადა.

მის სიტყვებს ალექსანდრ ლუკაშენკოსთან დაახლოებული Telegram-არხი "პულ პერვოგო" ავრცელებს.

რა თქვა: "ბელარუსი "კეთილი ნების ჟესტის სახით" 25 პატიმარს გაათავისუფლებს". - განაცხადა კოულმა. ვის გაათავისუფლებენ კონკრეტულად, მას არ დაუკონკრეტებია.

• კოულის თქმით, მინსკმა და ვაშინგტონმა განიხილეს "საერთაშორისო საკითხები, ორმხრივი დღის წესრიგის საკითხები და საერთო ინტერესის სფეროში შემავალი სხვა თემები".
• ასევე შეათანხმეს ერთგვარი "შუალედური შეთანხმება". მხარეები "გააგრძელებენ მუშაობას დარჩენილი საკითხების მოსაგვარებლად".
• "როდესაც ყველა საკითხი გადაიჭრება და ორივე მხარის მიერ შეთანხმდება, მოხდება პირთა დამატებითი გათავისუფლება და ბელარუსული კომპანიებისთვის სანქციების მოხსნა". - თქვა კოულმა.

კონტექსტი: ჯონ კოული მინსკში ალექსანდრ ლუკაშენკოსთან მოსალაპარაკებლად 15 სექტემბერს ჩავიდა.

• მანამდე ის ვილნიუსში გაფრინდა, სადაც ლიეტუვის საგარეო საქმეთა მინისტრს, კესტუტის ბუდრისს შეხვდა.
• მათ ბელარუსში პოლიტიკური პატიმრების გათავისუფლების მცდელობები და რეგიონში უსაფრთხოების კუთხით არსებული ვითარება განიხილეს.
• აგვისტოს ბოლოს კოული აცხადებდა, რომ აშშ-მა ბელარუსში უკვე მიაღწია 500 პატიმრის გათავისუფლებას, ხოლო კიდევ 200 ადამიანი ლუკაშენკოს შეწყალების განკარგულებებით გათავისუფლდა.