ახალი ამბები

უახლოეს დღეებში ფინეთი უკრაინას F-16-ის ტიპის გამანადგურებლებისთვის განკუთვნილ სპეციალურ საბრძოლო მასალას გადასცემს.

ამის შესახებ პრეზიდენტმა ზელენსკიმ ფინეთის პრეზიდენტთან სატელეფონო საუბრის შემდეგ განაცხადა.

რატომ არის მნიშვნელოვანი: ეს შეიარაღება კრიტიკულად აუცილებელია ახალი, მაღალსიჩქარიანი რუსული რეაქტიულ ძრავიანი დრონების ჩამოსაგდებად.

• სტანდარტულ სახმელეთო თავდაცვის სისტემებსა და მობილურ ჯგუფებს (რომლებიც ტყვიამფრქვევებს იყენებენ) ძალიან უჭირთ ასეთ სისწრაფეზე რეაგირება.
• ზელენსკის თქმით, ამიერიდან სწორედ ეს საბრძოლო მასალა უზრუნველყოფს სწრაფი რეაქტიული "შაჰედების" განადგურებას.

დრონების ამბავი: რუსეთი მასობრივად გადადის ტურბორეაქტიულ დამრტყმელ დრონებზე, რამაც უკრაინას სერიოზული ტაქტიკური პრობლემა შეუქმნა.

• თუ ძველი თაობის Geran-ის (იგივე  "შაჰედი“) ტიპის დრონები180-200 კმ/სთ სიჩქარით დაფრინავს, ახალი რეაქტიული დრონების სიჩქარე 600 კმ/სთ-ს აღწევს (სამომავლოდ კი უკრაინელი სამხედროები 800-900 კმ/სთ სიჩქარესაც ვარაუდობენ).

• დღეს რუსული საჰაერო იერიშების 40-60% სწორედ ამ სწრაფ რეაქტიულ დრონებზე მოდის (სამომავლოდ შეიძლება 80%-მდეც ავიდეს).

• იმის გამო, რომ ამ დრონების გამოჩენიდან სამიზნემდე დრო ძალიან მცირეა, უკრაინას თავდაცვისთვის სულ უფრო მეტად უწევს ავიაციაზე (F-16-ებზე) დაყრდნობა.

კონტექსტი: უკრაინის საჰაერო ძალები მწვავე დეფიციტს განიცდიან ჰაერი-ჰაერი კლასის რაკეტებში.

• ამასთანავე, პრობლემებმა იჩინა თავი F-16-ების სრული ინსპექტირებისა და შეკეთების პროცესშიც.