ახალი ამბები

ორშაბათს, ნატო-ს უმაღლესმა სამხედრო სარდალმა და აშშ-ის ძალების ხელმძღვანელმა ევროპაში, გენერალმა ალექსუს გრინკევიჩმა რუსული თავდასხმის აღკვეთის ახალ გეგმა წარადგინა.

ვითარების არსი: ორშაბათს, გენერალმა ალექსუს გრინკევიჩმა ვარშავაში წარადგინა ალიანსის ახალი სამხედრო გეგმა - როგორ უნდა შეაჩერონ რუსეთის პოტენციური თავდასხმა აღმოსავლეთ ფლანგზე. გეგმა უკრაინის ომის გამოცდილებას ეყრდნობა.

• "გამარჯვების თეორია" - გენერლის ხედვა მარტივ პრინციპზე დგას: მტრის თავდაპირველი იერიში უნდა დაიბლოკოს, ხოლო აგრესიის გაგრძელების შემთხვევაში, განადგურდეს მოწინააღმდეგის მართვისა და მომარაგების ქსელები.

• შეტევა საწყის ეტაპზევე ისე უნდა შეჩერდეს, რომ მტერმა სტრატეგიული მარცხი არ იწვნიოს. ეს ბირთვული ან კონვენციური ესკალაციის რისკებს მინიმუმამდე დაიყვანს.

• გრინკევიჩის თქმით, ეს სტრატეგია ევროპელების დასამშვიდებლად გასაჯაროვდა, მტრისთვის კი პირდაპირი გზავნილია: "თუ ვინმე იმდენად სულელი აღმოჩნდება, რომ ჩვენს ტერიტორიაზე შემოიჭრას - სიტუაცია კონტროლქვეშ გვაქვს".

როგორ იმუშავებს ახალი სტრატეგია: გეგმა, რომლის საიდუმლო ვერსიაც 3 თვის წინ დასრულდა, "იაფფასიან მასაზე" (უკრაინაში გამოცდილ იაფ დრონებზე) და თანამედროვე ტექნოლოგიებზე დგას:

• ავტონომიური ზონა: შეიქმნება ვრცელი ზონა, სადაც დრონები და სახმელეთო რობოტები რუსულ შეტევას ნატო-ს ძალებში დიდი მსხვერპლის გარეშე შეაჩერებენ.

• შორ მანძილზე დარტყმები: ნატო-ს რაკეტები მყისიერად გაანადგურებენ რუსულ საჰაერო თავდაცვასა და სამეთაურო პუნქტებს კალინინგრადში, სანქტ-პეტერბურგის მახლობლად და ბელარუსში.

• მონაცემთა გაზიარება: მოკავშირეები სამიზნეების შესახებ საიდუმლო ინფორმაციას ღრუბლოვანი ტექნოლოგიებით, წამებში გაუზიარებენ ერთმანეთს.

• მიზანი ერთია - პუტინმა ნატო-ს თავდაცვას შეხედოს და თქვას: "დღეს არა".

კონტრასტი ტრამპთან: იმ ფონზე, როცა გრინკევიჩი მოსკოვს რბილად აფრთხილებდა, დონალდ ტრამპის განცხადებებმა ევროპა შოკში ჩააგდო.

• ტრამპმა რუსული დიზელის იმპორტზე გარიგება გამოაცხადა, რუსულ ენერგოობიექტებზე დარტყმების გამო ზელენსკი გააკრიტიკა და "ენერგეტიკული ზავის" ინიციატივით გამოვიდა. (თუმცა, ზავის გამოცხადებიდან მალევე, რუსეთმა ხარკივის ელექტროსადგური მაინც დაბომბა).

• ნატო-ს ყოფილი ელჩის, კურტ ვოლკერის თქმით, სამხედრო გეგმები მნიშვნელოვანია, მაგრამ ევროპას ახლა ყველაზე მეტად ტრამპის მოულოდნელი "გამოხტომები" და ევროპიდან აშშ-ის ჯარის შესაძლო გაყვანა აშინებს.

ახალი რეალობა და გამოწვევები: ნატო-ში ეგონათ, რომ რუსეთს უკრაინაში ომის დასრულების შემდეგ მოსამზადებლად წლები ექნებოდათ.

• თუმცა, ახლა რუსეთი ევროპაში "ჩრდილოვან ომს" აწარმოებს - აწყობს საბოტაჟებს და გზავნის დრონებს (მაგალითად, გერმანიაში, ლაიფციგის აეროპორტში).
• ალიანსს დროში რბოლა უწევს, რასაც შეიარაღების დეფიციტიც ართულებს: ევროპაში PAC-3 Patriot-ისა და ATACMS-ის რაკეტების ნაკლებობაა, რადგან ამერიკული მარაგი ირანთან საბრძოლველად, ახლო აღმოსავლეთში იგზავნება.

• ამავდროულად, პენტაგონი განიხილავს ევროპაში ამერიკული სამხედრო კონტინგენტის შემცირებასაც.

რა ხდება ახლა: ამ სტრატეგიის დასატესტად, ევროპაში 10-დღიანი სამხედრო წვრთნები მიმდინარეობს, სადაც 20 000-ზე მეტი ჯარისკაცი აღმოსავლეთიდან მასშტაბურ შემოჭრას იგერიებს.

• ექსპერტების შეფასებით, ნატო-მ გეგმა კი შეადგინა, მაგრამ ახლა მთავარია, წევრმა ქვეყნებმა იპოვონ ფული და პოლიტიკური ნება მის შესასრულებლად.
• თავად გრინკევიჩმა კი მოუწოდა ევროპას, არ შეწყვიტონ უკრაინის დაფინანსება (PURL პროგრამის ფარგლებში), რათა დასავლეთმა მტერს საკუთარი სიძლიერე დაუმტკიცოს.
• ამერიკელი გენერლის სტრატეგია ტრამპისა და მოსკოვის "საწვავის გარიგების" ფონზე ხმაურდება და რუსული იერიშის ადგილზევე ბლოკირებას ისახავს მიზნად.