ახალი ამბები

როგორც "კომერსანტი" წერს, გამოცემას რუსეთის პრეზიდენტის ადმინისტრაციის წარმომადგენელმა განუცხადა, რომ "სამხრეთ ოსეთის სტატუსისა და შემდგომი განვითარების სტრატეგიული საკითხის გადაწყვეტის დრო დადგა".

ვითარების არსი: "საჭიროა მაქსიმალურად სწრაფად გამოვიდეთ ანკლავური მდგომარეობიდან პოლიტიკურ, სოციალურ და ეკონომიკურ ასპექტებში. ამისათვის შეიცვალა კონსტიტუცია და გადაიხედა ბინადრობის ცენზი უმაღლესი ხელისუფლების ორგანოების წარმომადგენლებისთვის". - ციტირებს "კომერსანტი" კრემლის ადმინისტრაციის წარმომადგენლის სიტყვებს.

წინარე ისტორია: ოკუპირებული სამაჩაბლოს ე.წ. კონსტიტუციაში ცვლილება შევიდა, რომელიც რუს ჩინოსნებს თვითგამოცხადებულ სამხრეთ ოსეთის რესპუბლიკაში უმაღლესი თანამდებობის დაკავების უფლებას აძლევს.

• საკონსტიტუციო ცვლილებებს ხელი მოაწერა ე.წ. პრეზიდენტმა, ალან გაგლოევმა.

• სამხრეთ ოსეთის კონსტიტუციის შესწორება მას შემდეგ მოხდა, რაც 9 მაისს თვითგამოცხადებულ რესპუბლიკასა და რუსეთს შორის შეთანხმება გაფორმდა.

• დოკუმენტმა მოიცვა სფეროების ფართო სპექტრი და, ფაქტობრივად, საფუძველი ჩაუყარა სამხრეთ ოსეთისა და რუსეთის ინტეგრაციას ყველა დონეზე.

• როგორც გამოცემა წერს, მთავარი პუნქტი გახდა საჯარო სამსახურში მუშაობისთვის დაწესებული 10-წლიანი ბინადრობის ცენზის გაუქმება - მის ნაცვლად ამოქმედდება ნებართვა, რომლის მიხედვითაც ორივე ქვეყნის მოქალაქეებს შეეძლებათ დაიკავონ სახელმწიფო და მუნიციპალური თანამდებობები.

სიღრმისეულად: შეცვლილი კონსტიტუციის ზემოთხსენებულმა პუნქტმა მისცა გაგლოევს რუსეთის პრეზიდენტის ადმინისტრაციაში გადასვლის საშუალება.

• სააგენტო "რესის" მიერ გავრცელებულ ვიდეომიმართვაში გაგლოევმა ვლადიმერ პუტინს ოსეთის "ისტორიული ლიდერი" უწოდა და რეგიონის რუსეთის შემადგენლობაში შესვლის ღია მზადყოფნა გამოთქვა.
• "დღეს ჩვენი ამოცანაა გავაკეთოთ ისე, რომ ახდეს ჩვენი სანუკვარი ოცნება - დავძლიოთ გაყოფილი ხალხის ხვედრი და გავერთიანდეთ ჩრდილოეთ ოსეთთან, გავერთიანდეთ დიდ რუსეთთან". - განაცხადა გაგლოევმა.
• ამავე ცვლილებით, 16 ივნისს, ჩრდილოეთ ოსეთის მაღალჩინოსანი მარატ კამბოლოვი ე.წ. სამხრეთ ოსეთის პრემიერ-მინისტრი გახდა, ხოლო 23 ივნისს პრეზიდენტის მოვალეობის შემსრულებლის თანამდებობა დაიკავა.
• 2027 წელს დაგეგმილ დე ფაქტო საპრეზიდენტო არჩევნებზე კამბოლოვის კანდიდატურა განიხილება.