ახალი ამბები

მოსკოვში მსხვილი თაღლითობის ბრალდებით დააკავეს მილიარდერი ვალერი კუსტოვი, რომელიც ხელმძღვანელობს დირექტორთა საბჭოს და წარმოადგენს ჯგუფ "ეფკოს" ძირითად აქციონერს (42%).

რუსი მილიარდერის დაკავების შესახებ ინფორმაციას რუსული მედიები ავრცელებენ.

ვითარების არსი: მასთან ერთად დაკავებულია "ეფკოს" გენერალური დირექტორი ევგენი ლაშენკო.

• როგორც მედიები წერენ, კუსტოვს უკვე შეუფარდეს პატიმრობა 29 სექტემბრამდე. ლაშენკოსთვის აღკვეთის ღონისძიების შერჩევა უახლოეს ხანში იგეგმება.
• გამოძიება უკავშირდება უპილოტო ავიასისტემების პროექტ "მომავლის ტრანსპორტს". 2026 წლის მაისის დასაწყისში ამ საქმეზე დააპატიმრეს ამ კომპანიის ყოფილი გენერალური დირექტორი, სამარის ოლქის გუბერნატორის ყოფილი მრჩეველი იური კოზარენკო.
• როგორც ჩანს კუსტოვი კოზარენკოს ჩვენებების საფუძველზე დააკავეს.
  
• "მომავლის ტრანსპორტის" ერთ-ერთ პროდუქტია დრონი C-80, რომელსაც რუსეთის ჯარი ფრონტზე იყენებს.
• 2026 წლის ივნისის შუა რიცხვებში, უკვე იური კოზარენკოს დაპატიმრების შემდეგ, რუსეთის თავდაცვის მინისტრმა ანდრეი ბელოუსოვმა, ვლადიმერ პუტინის თანდასწრებით, C-80 დრონებზე კრიტიკულად ისაუბრა.
  

ჩაშლილად: 29 ივლისს, ამავე სისხლის სამართლის საქმეზე დააპატიმრეს "ეფკოს" განვითარების დირექტორის მოადგილე, კუსტოვის რძალი ეკატერინა კუსტოვა და ჯგუფის მმართველი კომპანიის სტრატეგიული განვითარების დირექტორი ვლადისლავ რომანცევი.

• ასევე საგამოძიებო იზოლატორში აღმოჩნდა მრეწველობისა და ვაჭრობის სამინისტროს უპილოტო სისტემებისა და რობოტექნიკის სამმართველოს უფროსის მოადგილე ალა პოლოვჩენია. მას ეჭვმიტანილად მიიჩნევენ განსაკუთრებით დიდი ოდენობით თანხის მითვისება-გაფლანგვაში.
  

წინარე ისტორია: ვალერი კუსტოვმა კომპანია "ეფკო" პარტნიორებთან ერთად 1994 წელს დააარსა.

• ამჟამად ის რუსეთში კვების პროდუქტების ერთ-ერთი უმსხვილესი მწარმოებელია. კომპანია ფლობს ბრენდებს: "სლობოდა", Altero, DeOlio და Fresh.
• 2025 წელს "ეფკომ" შეიძინა აქტივები, რომლებიც მანამდე ამერიკულ კომპანია Bunge-ს ეკუთვნოდა. გარიგებაში, სხვა აქტივებთან ერთად, შევიდა ბრენდები "ოლეინა" და Ideal.
• კუსტოვის ქონება 1.1 მილიარდ დოლარადაა შეფასებული. ის Forbes-ის 2026 წლის რუს მილიარდერთა რეიტინგში 144-ე ადგილს იკავებს.
• კომპანია "მომავლის ტრანსპორტი" 2021 წელს შეიქმნა, როგორც ჯგუფ "ეფკოს" დირექტორთა საბჭოს წევრების პროექტი.
• ის აგროდრონებისა და გადამზიდი უპილოტო საფრენი აპარატების შემუშავებითაა დაკავებული. ყოველ შემთხვევაში, ეს ინფორმაცია მითითებულია ოფიციალურ ვებგვერდზე.
• 2023 წელს "მომავლის ტრანსპორტი" გამოვიდა "ეფკოს" შემადგენლობიდან და მას შემდეგ, კოზარენკოს თქმით, კერძო ინვესტიციებისა და სესხით აღებული სახსრების ხარჯზე არსებობდა.
  
• იმავი წლის დეკემბერში კომპანიამ დრონების წარმოების მეორე ქარხანა გახსნა. ამ პროექტში ინვესტიციების საერთო მოცულობა შვიდ მილიარდ რუბლად შეფასდა.