ახალი ამბები

რუსეთი უკრაინაზე ბალისტიკური რაკეტებით დარტყმების ინტენსივობის გასაზრდელად ემზადება, რადგან სამშვიდობო შეთანხმების შესახებ მოლაპარაკებები ჩიხში შევიდა.

ვითარების არსი: Bloomberg-ის ცნობით, ამჟამად რუსეთი განიხილავს კიევზე, კერძოდ დედაქალაქის ცენტრზე, და უკრაინის სხვა ქალაქების ინფრასტრუქტურულ ობიექტებზე ბალისტიკური რაკეტებით დარტყმების გაძლიერების შესაძლებლობას.

• გამოცემის წყაროების თქმით, მოლაპარაკებების ყველა მცდელობა ფაქტობრივად ჩაიშალა და ორივე მხარე საწყის წერტილს დაუბრუნდა.
• მათ ასევე აღნიშნეს, რომ რუსეთის პრეზიდენტი ვლადიმერ პუტინი არ შეწყვეტს ომს სანქციების, ეკონომიკური ზეწოლისა და რუსულ ნავთობგადამამუშავებელ ქარხნებსა თუ ლოგისტიკურ ქსელებზე უკრაინული თავდასხმების გამო.
• "მოსკოვი უკრაინულ დარტყმებს სულ უფრო ხშირად განიხილავს, როგორც ნატოს ქვეყნების თავდასხმებს, ვინაიდან ალიანსის წევრები კიევს იარაღითა და სადაზვერვო მონაცემებით უზრუნველყოფენ. საბრძოლო მოქმედებების მიმდინარე ფაზა არ წარმოადგენს სამხედრო ესკალაციის პიკს," - წერს Bloomberg.

სტრიქონებს შორის: კრემლთან დაახლოებული ოთხი პირის თქმით, დიპლომატიური ძალისხმევის არარსებობის პირობებში, მოსკოვი საკუთარი სამხედრო მიზნების მისაღწევად კონფლიქტის შემდგომი ესკალაციის მცირე ალტერნატივას ხედავს.

• გამოცემის ცნობით, მიუხედავად იმისა, რომ რუსეთი აშშ-ის პრეზიდენტის წარმომადგენლების, ჯარედ კუშნერისა და სტივ უიტკოფის ახალი წინადადებების იმედი აქვს, მოლაპარაკებებში გარღვევის მოლოდინი ძალიან დაბალია.

დიდი სურათი: კრემლთან დაახლოებული პირების თქმით, ამჟამად სულ უფრო მეტი რუსი მაღალჩინოსანი მიდის დასკვნამდე, რომ პუტინმა, უკიდურეს ზომად, შესაძლოა საბოლოოდ მიიღოს უკრაინაში ტაქტიკური ბირთვული იარაღის გამოყენების გადაწყვეტილება.

• "ბოლო დროს მოსკოვში გაძლიერდა იმ 'ქორების' ხმები, რომლებიც ასეთი ნაბიჯის გადადგმას ემხრობიან. ასეთი უკიდურესი რეაქცია შესაძლებლად ითვლება, ვინაიდან პუტინისთვის ერთადერთი შედეგი, რაც ომის გაგრძელებაზე უარესია, მასში დამარცხება იქნება," – წერს Bloomberg, თუმცა იქვე ხაზს უსვამს, რომ "ჯერჯერობით არ არსებობს არანაირი ნიშანი, რომ რუსეთი უკრაინაში ბირთვული იარაღის გამოსაყენებლად ემზადება."