ახალი ამბები

უკრაინული დრონების დარტყმების შედეგად გამოწვეული მწვავე დეფიციტის ფონზე, მსოფლიოს ერთ-ერთი უმსხვილესი ნავთობმომპოვებელი ქვეყანა, რუსეთი, იძულებულია ბენზინი ინდოეთიდან შემოიტანოს.

ინფორმაციას ამის შესახებ ჟურნალი Financial Times ავრცელებს.

ვითარების არი: მასალა ეყრდნობა ანალიტიკურ კომპანია Kpler-ს, რომლის მონაცემებით, ინდოეთის „ვადინარის“ ქარხნიდან გამოგზავნილი 42 ათასი ტონა ბენზინით დატვირთული ტანკერი ჩრდილოეთ რუსეთის პორტ „ბელოიე ზორეს“ კვირას მიაღწევს.

• ინდოეთის ქარხანა „ვადინარის“ 49%-ს რუსული "როსნეფტი" ფლობს, ხოლო თავად ქარხანაში გადამუშავებული ნედლი ნავთობის 90%-ზე მეტი 2026 წელს რუსეთიდან იყო შესული.

• შესაბამისად, მოსკოვს საკუთარივე ნავთობისგან გადამუშავებული ბენზინის უკან ყიდვა უწევს.

• უკრაინულმა იერიშებმა რუსეთის შიდა გადამუშავების სიმძლავრეები 40%-ით შეამცირა, რამაც საბჭოთა კავშირის დაშლის შემდეგ ყველაზე მძიმე საწვავის კრიზისი გამოიწვია.

• FT-ის შეფასებით, პრობლემა დაახლოებით 50 მილიონ რუსს შეეხო.
  

სხვა წყაროები: ინდოეთის გარდა, რუსეთმა საწვავის შესყიდვა მკვეთრად გაზარდა ბელარუსიდანაც. ივნისში ბელარუსმა რუსეთს184 ათასი ტონა ბენზინი მიჰყიდა, რაც გასული წლის ანალოგიურ პერიოდთან შედარებით 184-ჯერ მეტია.

კონტექსტი: კრემლმა საწვავის იმპორტის გეგმა ოფიციალურად ივნისის ბოლოს გამოაცხადა. ვლადიმერ პუტინმა პრობლემას „დროებითი სირთულეები“ უწოდა, ხოლო ვიცე-პრემიერმა 8 ივლისს ნავთობპროდუქტების იმპორტის დაწყება დაადასტურა.

• იმპორტის გარდა, რუსეთმა ვითარების შემსუბუქება საწვავის ხარისხობრივი სტანდარტების დაწევითა და ლოგისტიკის ცვლილებით სცადა, რამაც მდგომარეობა ნაწილობრივ განმუხტა მოსკოვსა და სანქტ-პეტერბურგში, თუმცა რეგიონებში მძიმე ვითარება ნარჩუნდება.