უკრაინის პრეზიდენტმა ვოლოდიმირ ზელენსკიმ, რუსეთის მიერ უკრაინის სხვადასხვა ქალაქების დაბომბვის კომენტირებისას, განაცხადა, რომ უკრაინა ისე უპასუხებს ამ თავდასხმებს, რომ რუსეთმა ვეღარ შეძლოს ომის გაგრძელება.
ვითარების არსი: მისი თქმით, რუსმა სამხედროებმა ზაპოროჟიეში სამოქალაქო ობიექტებსა და ტრანსპორტზე "ნადირობა მოაწყვეს." მან ასევე "სასტიკი და აბსოლუტურად უაზრო" უწოდა დნიპროში მდებარე სამოქალაქო საწარმოს დაბომბვას.
- "რუსეთი აგრძელებს თავის სწორედ რომ ტერორისტულ ომს უკრაინისა და უკრაინელების წინააღმდეგ. რა თქმა უნდა, ჩვენ სრულიად სამართლიანად ვუპასუხებთ რუსეთს ყველა ამ დარტყმას. და ჩვენ ამას ვაკეთებთ ისე, რომ პირველ რიგში დაზარალდეს რუსული სახელმწიფო სისტემა და რუსეთის შესაძლებლობა, გააჭიანუროს ომი." - აღნიშნა მან.
- ზელენსკიმ ასევე განაცხადა, რომ რუსეთში ბენზინის დეფიციტი არის ომისა და უკრაინის მიერ შორ მანძილზე განხორციელებული დარტყმების ერთ-ერთი შედეგი: "ჩვენ ომის რეალობას რუსეთში ვაბრუნებთ და მაქსიმალურად ვართულებთ ჩვენი ტერიტორიების ოკუპაციის გაგრძელებას."
სტრიქონებს შორის: უკრაინის პრეზიდენტმა მადლობა გადაუხადა უკრაინელ სამხედროებს, განსაკუთრებით დონეცკის ოლქში, სადაც რუსული შტურმების ყველაზე დიდი რაოდენობა ფიქსირდება.
- მან ყველას შეახსენა, რომ სრულმასშტაბიანი ომის დაწყებიდან რუსეთმა დონეცკის ოლქის აღების ვადა უკვე 15-ჯერ გადაწია.
- გარდა ამისა, ზელენსკიმ უახლოეს კვირებში აქტიური საერთაშორისო მუშაობა დააანონსა და პარტნიორებისგან პოზიტიური გადაწყვეტილებების იმედი გამოთქვა: "ივნისი-ივლისი შედეგიანი უნდა გახდეს უკრაინისთვის, პირველ რიგში, უსაფრთხოების გარანტირების ჩვენი საერთო სწრაფვისთვის. მშვიდობა აუცილებელია."
დიდი სურათი: 29 ივნისს, ზაპოროჟიეში სამარშრუტო ტაქსიზე განხორციელებული რუსული დარტყმის შედეგად სამი ადამიანი დაიღუპა, ექვსი კი - დაშავდა.
- გარდა ამისა, 29 ივნისს, საღამოს, რუსულმა ჯარებმა დღის განმავლობაში მეორედ დაბომბეს ავტობუსი ზაპოროჟიეში და ასევე საოლქო სახელმწიფო ადმინისტრაციის შენობა - დაშავდა შვიდი ადამიანი.
რუსმა ოკუპანტებმა ქალაქი დნიპრო 29 ივნისს, დილით დაბომბეს. თავდასხმის შედეგად 6 ადამიანი დაიღუპა.
დაკავშირებული თეგები
