ბორელი: EU-ს რუსული ნავთობის ემბარგოზე შესათანხმებლად კიდევ 2 კვირა დასჭირდება
ევროკავშირს რუსული ნავთობის ემბარგოზე კონსენსუსის მისაღწევად კიდევ ორი კვირა შეიძლება დასჭირდეს, აცხადებს საგარეო პოლიტიკის საკითხებში ბლოკის უმაღლესი წარმომადგენელი ჟოზეპ ბორელი.
რუსულ ნავთობზე სანქციების გამოსაცხადებლად, რაც ევროკომისიამ 4 მაისს დააანონსა, მთავარ დაბრკოლებად უნგრეთის პოზიცია რჩება.
ბუდაპეშტში ბრიუსელისგან რუსულ ნავთობზე უარის სათქმელად მეტ დროს და ფინანსებს ითხოვენ.
ევროკავშირის წამყვანი დიპლომატის განცხადებით, თანხმობის მისაღწევად „ტექნიკურ საკითხებზე“ შეჯერებაა საჭირო, რაც ერთ ან ორ კვირას მოითხოვს.
თუმცა ბრიუსელში კონსენსუსის რესურსი ნელ-ნელა იწურება. „ამ მომენტში არაფერში არ ვარ დარწმუნებული“, - ამბობს ერთ-ერთი ევროპელი დიპლომატი POLITICO-სთან.
ევროკავშირში სანქციების ასამოქმედებლად 27-ვე წევრი ქვეყნის თანხმობაა საჭირო.
უნგრეთის ლიდერმა ვიქტორ ორბანმა განაცხადა, რომ რუსულ ნავთობზე უარის თქმას ეკონომიკურად „ბირთვული ბომბის“ ტოლფასი ეფექტი ექნება.
