ახალი ამბები

ბრიტანეთის პრემიერ-მინისტრი რიში სუნაკი კმაყოფილია იმ კანონის ეფექტით, რომელიც ითვალისწინებს არალეგალი მიგრანტების რუანდაში დეპორტაციას.

ამის შესახებ Bloomberg წერს.

ბრიტანეთის პრემიერ-მინისტრის თქმით, ირლანდიაში თავშესაფრის მაძიებელთა რაოდენობის ზრდამ აჩვენა, რომ ბრიტანეთის მთავრობის გეგმა უკვე მოქმედებს როგორც არალეგალური იმიგრაციის შემაკავებელი.

მისი თქმით, კანონს "გავლენა აქვს, რადგან ხალხს ეშინია აქ ჩამოსვლის."

სუნაკმა ირლანდიის ხელისუფლების მიერ გაჟღერებულ შეშფოთებას უპასუხა, რომ მიგრანტები, რომლებიც ცდილობენ თავიდან აიცილონ რუანდაში დეპორტაცია, ტოვებენ ბრიტანეთს და თავშესაფარს ირლანდიაში ითხოვენ.

"თუ ადამიანები ჩვენს ქვეყანაში არალეგალურად ჩამოდიან, მაგრამ იციან, რომ ვერ შეძლებენ დარჩენას, ისინი ნაკლებად სავარაუდოა, რომ ჩამოვლენ და ამიტომაა რუანდის სქემა ასე მნიშვნელოვანი," - თქვა სუნაკმა.

ამ კვირაში ბრიტანეთის პარლამენტმა მიიღო კანონი თავშესაფრის მაძიებლების რუანდაში გაძევების შესახებ, რომელიც მიზნად ისახავს მიგრანტებისთვის მოტივაციის შემცირებას, რომლებიც საკუთარი სიცოცხლის რისკის ქვეშ ცდილობდნენ ბრიტანეთში პატარა გემებით ლა მანშის სრუტით შესვლას.

ბრიტანეთისგან განსხვავებით, ირლანდია ევროკავშირის წევრია - ამის გამო თავშესაფრის მაძიებელთა მიმართ მოთხოვნები ქვეყნებში განსხვავებულია.

ამიტომ ირლანდია კანონმდებლობას ცვლის. ქვეყნის იუსტიციის მინისტრი ჰელენ მაკენტი კანონპროექტს წარადგენს, რომელიც გაამარტივებს მიგრანტების ბრიტანეთში გაძევებას.